चितवन, साउन १
भरतपुर अस्पतालमा पाँच वर्षीय नाबालिकाको सेफ्टीट्याङ्कीमा खसेर मृत्यु भएको घटनाप्रति राष्ट्रिय युवा संघ नेपाल भरतपुर महानगर कमिटीले गम्भीर ध्यानाकर्षण जनाएको छ ।
देशकै केन्द्रीय स्तरको अस्पतालको रुपमा मान्यता पाएको चितवनकै भरतपुर अस्पतालमा पाँच वर्षीय नाबालिका अन्जना मगरको सेफ्टीट्याङ्कीमा खसेर मृत्यु भएको घटनाप्रति भरतपुर महानगर कमिटीले गम्भीर ध्यानाकर्षण जनाएको हो ।
भरतपुर महानगर कमिटीले बिहीबार एक विज्ञप्ति जारी गर्दै भनेको छ, अस्पताल जस्तो संवेदनशिल क्षेत्र, त्यहाँमाथि निमुखा जनताहरुले प्रत्यक्ष सेवा लिने आउने आम सर्वसाधारणको आशा एवम् भरोसा रहेको सरकारी अस्पतालमा यस प्रकारका गम्भीर घटना निम्तनुलाई हामीले निकै अर्थपूर्णरुपमा लिएका छौं । बालबालिकाहरुका लागि खेल्न बनाइएको चिल्ड्रेन पार्क जस्तो क्षेत्रमा सेफ्टी टेंकीको ढक्कन समेत नलगाई खुला छाडिनु अस्पताल प्रशासनको गम्भीर लापरवाही रहेको विज्ञप्तिमा उल्लेख गरिएको छ ।
अस्पताल प्रशासनले घटनालाई ढाकछोप गर्न एवम् पीडित परिवारलाई अनावश्यक दवाव र अमूर्त आश्वासन दिएको समेत बुझिन आएकाले त्यसप्रति घोर आपत्ति र भत्र्सना समेत गर्न चाहन्छौं। साथै अस्पताल प्रशासनवाट भएको यस प्रकारको गम्भीर अपराधको भागीदार अस्पताल विकास समिति अध्यक्ष, मेसु लगायतले जिम्मेवारी लिंदै घटनाको सत्यतथ्य छानविनमा वाधा नपुग्ने गरी राजीनामा दिनुपर्ने समेत रहेको राष्ट्रिय युवा संघ नेपाल भरतपुर महानगर कमिटीका कार्यवाहक अध्यक्ष राम कार्कीले विज्ञप्ति मार्फत जनाएका छन् ।
