– हिरालाल आचार्य ‘डायमण्ड’
चितवन, बैशाख २९ –
भरतपुर महानगरपालिका १ पोखरा बसपार्कमा रहेको आदिकवि भानुभक्त माध्यमिक विद्यालयमा अनुत्तिर्ण भइसकेका विद्यार्थीलाई नियम विपरित पुनः परीक्षा लिन लागेको पाइएको छ ।
कक्षा ४ र ५ मा अनुत्तिर्ण भएका विद्यार्थीहरुलाई पुनः परीक्षा लिन लागिएको स्रोतले जनाएको छ । भोलि बैशाख ३० गते विद्यार्थीहरुलाई गोप्यरुपमा फोन गरेर बोलाएर सुटुक्क परीक्षा लिई पास गराउन खोजिएको पाइएको हो । सार्वजनिक सूचना पनि ननिकाली परीक्षा लिने तयारी गरिएको हो ।
नियमानुसार परीक्षाको नतिजा प्रकाशन सँगै पुनः परीक्षा लिनुपर्ने भए तत्काल निर्णयसहित सबै कक्षाको पुनः परीक्षा लिने गरी सूचना निकाल्नुपर्ने हुन्छ । तर भानु माविका प्रअ रामजी अधिकारीले आफूखुसी केही दिन अघिमात्र परीक्षा लिने एकलौटी निर्णय गरेका हुन् । नतिजा प्रकाशनसँगै पुनः परीक्षाको सूचना ननिकालेको अवस्थामा पुनः परीक्षा लिनै पाइँदैन । त्यहाँमाथि केही कक्षाका अनुत्तिर्ण विद्यार्थीलाईमात्र पुनः परीक्षा लिनु भनेको अन्य कक्षाका अनुत्तिर्ण विद्यार्थीमाथिको अन्याय पनि हो ।
भरतपुर महानगरपालिका शैक्षिक प्रशासन महाशाखा प्रमुख सुवास आचार्यले ४ र ५ कक्षाको मात्रै पुनः परीक्षा लिने कुरा गलत भएको बताए । उनले पुनः परीक्षा लिनुपर्ने भए नतिजा प्रकाशनसँगै सबै कक्षाको पुनः परीक्षा लिने सूचना निकाल्नुपर्ने बताए । उनले यदि भानु माविमा अहिले आएर निर्णय गरेर परीक्षा लिन लागिएको भए उक्त परीक्षाले मान्यता नपाउने बताएका छन् ।
सहायक प्रअ डम्बर शाहीले शिक्षक आन्दोलनका कारण भानु माविमा विद्यार्थीहरु कम भर्ना भएको बताए । आफ्ना विद्यालयका अधिकांश विद्यार्थी ४ र ५ कक्षामा अनुत्तिर्ण भएर बसेको अवस्थामा उनीहरुलाई पुनः मौका परीक्षा लिने कि भन्ने विषयमा छलफल भएको बताएका छन् । थप कुरा प्रअलाई बुझ्न सुझाउँदै आफूले थप प्रतिक्रिया दिन चाहेनन् ।
विद्यालयका प्रअ रामजी अधिकारी हाम्रो सम्पर्कमा आउन चाहेनन् । उनलाई पटकपटक सम्पर्क र मेसेज गर्दा पनि उनले कुनै प्रतिक्रिया जनाएनन् । यस विषयमा विस्तृत समाचारका लागि चितवन आज हेरिरहनु होला ।
