चितवन, जेठ २९ –
जिल्ला समन्वय समिति (जिसस) मा १६ जनाको उम्मेद्वारी परेको छ । उपप्रमुखमा गठबन्धनकी उम्मेद्वार नेकपा (एकीकृत समाजवादी)की कल्पना काफ्ले सापकोटाको निर्विरोध भएकी छिन् । उपप्रमुखमा अरु कसैको पनि उम्मेद्वारी नपरेको हो ।
नेकपा एमाले चितवनका अध्यक्ष रामप्रसाद न्यौपानेले एमालेले प्रमुख र सदस्यहरुमा मात्र उम्मेद्वारी दिएको बताए ।
मुख्य निर्वाचन अधिकृतको कार्यालय भरतपुरका अनुसार जिसस प्रमुखमा नेकपा (एमाले)बाट नारायण प्रसाद अधिकारी र सत्तागठबन्धनबाट नेपाली कांग्रेसका पूर्णबहादुर रानाभाटले उम्मेद्वारी दिएका छन् ।
तीन जना खुला सदस्यका लागि नेकपा (एमाले)बाट कृष्णभक्त भट्टराई, बाबुराम सुवेदी र लक्ष्मीनारायण चौलागाईंको उम्मेद्वारी परेको छ । गठबन्धनबाट नेपाली कांग्रेसका संजीव पौडेल, नेकपा (माओवादी केन्द्र)का अर्जुन भण्डारी र धर्मलाल देवकोटाको उम्मेद्वारी परेको छ ।
तीन जना महिला सदस्यका लागि एमालेबाट अनिता नेपाल र सविता चौधरीको उम्मेद्वारी परेको छ । गठबन्धनबाट कांग्रेसकी अनिता चौधरी, माओवादीकी सुमित्रा तामाङ श्रेष्ठ र नेकपा (एस)की पूजना गुरुङले उम्मेद्वारी दिएकी छिन् ।
एक दलित वा अल्पसंख्यक सदस्यका लागि नपाली कांग्रेसबाट केशरी माया सुनार र गुनु वि.क.ले उम्मेद्वारी दिएकी छन् ।
कार्यालयका अनुसार भोलि उम्मेद्वारको विरोधमा उजुरी, मनोनयनपत्र जाँच र उजुरी उपर निर्णय हुने छ । यस्तै भोलि नै उम्मेद्वारको नामावली प्रकाशन गर्ने, उम्मेद्वारले नाम फिर्ता लिने, उम्मेद्वारको अन्तिम नामावली प्रकाशन गर्ने र उम्मेद्वारलाई निर्वाचन चिन्ह प्रदान गरिने छ ।
जेठ ३१ गते मंगलबार हुने मतदानमा चितवनमा रहेका ७ पालिकाका प्रमुख र उपप्रमुखले भाग लिनेछन् । चितवनमा एमालेले ७ वटा प्रमुखउपप्रमुख जितेको छ भने गठबन्धनले पनि ७ वटै जितेको छ । उनीहरुको समान भोट रहेकाले मत बराबर हुने र गोलाप्रथाबाट टुंग्याउनुपर्ने संभावना देखिन्छ ।
