चितवन बैशाख २६
नेपाल आयुर्वेद औषधी व्यवसायी संघ (नाडा) द्वारा गैरआवासीय नेपाली संघ (एनआरएनए)का नवनिर्वाचित सचिव तिलक गैरेलाई एक कार्यक्रमका बीच बिहीबार सम्मान गरिएको छ ।
नेपाल आयुर्वेद औषधी व्यवसायी संघ, जिल्ला कार्य समिति चितवनका अध्यक्ष अशोक श्रेष्ठको सभापतित्वमा सम्पन्न उक्त कार्यक्रममा नवनिर्वाचित सचिव तिलक गैरे प्रमुख अतिथि रहनुभएको थियो । कार्यक्रमलाई सम्बोधन गर्दै प्रमुख अतिथि गैरेले नेपाली माटोमा रहेर देशको सेवामा लाग्नुभएका आयुर्वेद व्यवसायीहरुको खुलेर प्रशंसा गर्नुभयो । उहाँले विगतमा जस्तै आगामी दिनमा समेत नाडासँग हातेमालो गर्दै अगाडि बढ्ने प्रतिवद्धता व्यक्त गर्नुभयो ।
नाडा चितवनका अध्यक्ष श्रेष्ठले हरेक नेपालीहरुको भान्सालाई आयुर्वेदको औषधालयको रुपमा विकास गर्नुपर्नेमा जोड दिनुभयो । उहाँले स्वदेशी जडिबुटीलाई पराई बनाउँदै विदेशी उत्पादनमा नेपालीहरुले बढी प्राथमिकता दिएकोप्रति गुनासो गर्दैै यसले नेपालीहरुमा रोग प्रतिरोधी क्षमता ह्रास भई दीर्घ रोगीहरुको संख्यामा उल्लेख्य वृद्धिभएको बताउनुभयो ।
कार्यक्रममा गैरआवासीय नेपाली संघ, अनन्तेजो पोर्चुगलका सदस्य कुलप्रसाद गैरे, नाडा चितवनका सचिव हिरामणि शर्मा, सल्लाहकार संयोजक लेखनाथ कँडेल, सदस्य लालप्रसाद पौडेल, मौसमलाल गुप्ता, सल्लाहकार सदस्य केदार पौडेललगायतको उपस्थिति रहेको थियो । गैरआवासीय नेपाली संघको हालै सम्पन्न एकता महाधिवेशनमा गैंडाकोटका गैरे सचिव पदमा निर्विरोध निर्वाचत हुनुभएको हो ।
