भरतपुर । ग्रुप अफ इन्जिनियरिङ सोलुसन ‘ड्रिमलाइन’ले चौथो वार्षिकोत्सव तथा अन्तर्राष्ट्रिय श्रमिक दिवस मनाएको छ ।
वार्षिकोत्सव तथा श्रमिक दिवसको अवसरमा ड्रिमलाइनले बिहीबार छ जना घरधनीलाई घर हस्तान्तरण गर्नुका साथै श्रमिकहरुलाई सम्मान पनि गरेको छ ।
भरतपुर–११ नहरचोकस्थित ड्रिमलाइनले विगत पाँच वर्षदेखि घर तथा भवनको नक्सा बनाउनेदेखि संरचना निर्माणसम्मको काम गर्दै आएको छ । कार्यक्रममा सहभागी घरधनीहरुले ड्रिमलाइनले गरेको कामको प्रशंसा गर्दै सफलताको शुभकामना व्यक्त गरे ।
ड्रिमलाइनका अध्यक्ष दामोदर ढकालले कम्पनीमा आफुसहित सबै श्रमिक नै भएको बताए । श्रमिकको सामुहिक प्रयासबाट नै निर्माण कार्यलाई गति दिन सकेको उनले बताए । उनले गत वर्ष २०८१ सालमा छ वटा घर र पाँच वटा सरकारी भवन निर्माण सम्पन्न गरिएको बताए ।
यो वर्ष १४ वटा प्रोजेक्ट चालु अवस्थामा रहेको भन्दै उनले कर्मचारी अभावका कारण नयाँ ग्राहकहरुलाई केहि समय पर्खन भन्नुपरेको बताए । कम्पनीको आफ्नै ९० जना श्रमिक हुँदा पनि नपुगेको उनले सुनाए । यो वर्ष कम्तिमा नौ वटा प्रोजेक्ट सम्पन्न गर्ने लक्ष्य रहेको उनले जानकारी दिए । 
कार्यक्रममा स्वागत मन्तव्य राख्दै कम्पनीका प्रबन्ध निर्देशक अनिश काफ्लेले कम्पनीको मेरुदण्ड श्रमिकहरु भएको बताउँदै श्रमिकहरुको मेहनतकै कारणले कम्पनीले सफलता प्राप्त गरेको बताए । ग्राहकको विश्वासलाई आफुहरुले कहिल्यै विश्वासघात नगर्ने भन्दै उनले ग्राकहलाई सन्तुष्ट बनाउने कम्पनीको मुख्य ध्येय रहने बताए ।
कम्पनीका अपरेशन म्यानेजर दिपक ढकालले २०७७ साल माघ २० गते तीन जना युवाहरु मिलेर ड्रिमलाइन कम्पनी स्थापना गरिएको बताए । स्वदेशमै केहि गर्नुपर्छ भन्ने सोँचले कम्पनी स्थापना गरेको भन्दै उनले श्रमिकहरुको योगदानकै कारण कम्पनीले ग्राहकको मन जित्न सफल भएको बताए । कार्यक्रमको सञ्चालन सागर पौडेलले गरेका थिए ।
