काठमाडौं चैत २७
चितवन मेडिकल कलेज (सिएमसी) शिक्षण अस्पतालले बालकृष्ण श्रेष्ठ मेमोरियल अवार्ड प्राप्त गरेको छ । नेपाल चेम्बर अफ कमर्सको ७४ औं वार्षिक साधारण सभाको अवसरमा प्रधानमन्त्री केपी शर्मा ओलीले उक्त अवार्ड प्रदान गर्नुभएको हो । आज काठमाण्डौंमा आयोजित कार्यक्रममा सिएमसीका प्रशासन निर्देशक प्रताप देवकोटालाई प्रधानमन्त्री ओलीले उक्त अवार्ड प्रदान गर्नुभएको हो ।
समुदायलाई उत्कृष्ट स्वास्थ्य सेवा प्रदान गर्दै विभिन्न सामाजिक उत्तरदायित्व अन्तर्गत निःशुल्क स्वास्थ्य शिविर, जनचेतना, आकस्मिक उद्धार तथा अन्य सेवाहरु सञ्चालन गर्दै आएको र कोभिड प्रकोपको समयमा समुदाय तहमा निर्वाह गरेको उल्लेखनीय योगदानको कदर गर्दै सो अवार्ड प्रदान गरिएको हो ।
अवार्ड प्राप्त गरेपछि कान्तिपुर हेल्थसँग प्रतिक्रिया दिंदै निर्देशक देवकोटाले सिएमसीले समाजका लागि गरेको योगदानको कदर भएको बताउनुभयो । उहाँले भन्नुभयो “यो अवार्डले हामीलाई थप जिम्मेवार बनाएको छ, आगामी दिनमा समाजका लागि अरु बढी काम गर्ने प्रेरणा मिलेको छ ।” सिएमसीलाई छनोट गरेकोमा निर्देशक देवकोटाले आयोजकलाई धन्यवाद दिनुभयो ।
कार्यक्रमलाई सम्बोधन गर्दै प्रधानमन्त्री ओलीले विज्ञान प्रविधिको प्रयोगसहित प्रतिस्पर्धी र रचनात्मक रुपमा उद्योग–व्यवसायलाई अगाडि बढाउनु पर्ने बताउनुभयो । आजको कृत्रिम बौद्धिकताकोसमेत सदुपयोग गरी उत्पादन र उत्पादकत्व वृद्धिमा लाग्नुपर्नेमा उहाँले जोड दिनुभयो । “कसैलाई गालीगलौज, बदनाम र भ्रम छर्नका लागि सूचना प्रविधिको प्रयोग गर्नुहुँदैन । यसको प्रयोग मानिसलाई सहज रुपमा सेवासुविधा दिनका लागि हुनुपर्छ । हामीले बाह्य लगानी र संयुक्त लगानीलाई अझ अगाडि बढाउनुपर्ने हुन्छ । हरेक क्षेत्रमा सम्भावना छ भनेर तपाईंहरुले कन्भिन्स गर्न सक्नुहुन्छ”, प्रधानमन्त्री ओलीले भन्नुभयो । उहाँले चेम्बर आफ्ना निम्तिमात्रै होइन, देश र समाजका लागि नयाँ सोचका साथ एकताबद्ध भएर अगाडि बढिरहेको समेत बताउनुभयो ।
कार्यक्रममा विभिन्न क्षेत्रमा योगदान दिने उद्यमी–व्यवसायीलाई प्रधानमन्त्री ओलीबाट अवार्ड प्रदान गरिएको थियो भने चेम्बरको स्मारिका पनि लोकार्पण भएको थियो ।
सात सय शैयामा सञ्चालित सिएमसीले चितवनमा रहेर अति विशिष्टिकृत सेवा सहितको उपचार सेवा दिंदै आएको छ । कोभिडको समयमा सिएमसीले गरेको योगदानको सर्वत्र प्रशंसा हुने गरेको छ । सिएमसीले भगिनी संस्थाको रुपमा सबै खाले क्यान्सर उपचार हुने गरी सिएमसी क्यान्सर इन्स्टिच्यूट पनि सञ्चालन गरेको छ । जहाँ स्वास्थ्य बीमा, विपन्न उपचार सहित सरकारी अस्पतालको दररेटमा नै क्यान्सरको उपचार हुने गरेको छ ।
