यसअघि, माओवादी नेतृत्वको प्रचण्ड सरकार आफूले ठेक्का लगाएको विकास निर्माणका कामकोसमेत भुक्तानी दिन नसक्ने हालतमा पुगेको स्मरण गराउँदै सांसद गिरीले अघिल्लो सरकारले सिर्जना गरेको दायित्व अहिलेको सरकारले पूरा गरेको बताउनुभयो । बिग्रिएको अर्थतन्त्रलाई ट्याकमा ल्याउन अहिलेको सरकारले निरन्तर प्रयास गरिरहेको भन्दै उहाँले देशमा केही हुँदैन÷भएन भन्ने भाष्य गलत भएको बताउनुभयो । २०८४ सालको निर्वाचनमा पहिलो राजनीतिक शक्ति भन्ने लक्ष्यका साथ उच्च मनोबल बनाएर पार्टी र सरकारका बिरुद्ध गरिएको भ्रम चिरेर जनताकोमा जान सांसद गिरीले कार्यकर्तालाई आग्रह गर्नुभयो ।

नेपालका अप्ठ्यारा दिन अब १० वर्ष मात्रै रहने भन्दै नेता गिरीले भन्नुभयो “अहिले पूर्वाधारमा लगानी भईरहेको छ, पूर्वाधारपछि सिंगो राष्ट्रको काम उत्पादनमा जोडिने छ ।” आफूहरुसँग भएको सीप र पूँजी प्रयोग गरेर उत्पादनमा जोडिन उहाँले कार्यकर्तालाई आग्रह समेत गर्नुभयो ।

प्रगतिका लागि व्यक्ति बसाई सराई गर्ने भन्दै उहाँले जहाँ गएपछि विचार सँगसैगै जाने बताउनुभयो । चितवनमा बसोबास गर्ने पर्वतेलीहरुलाई सम्बोधन गर्दै उहाँले अगाडि भन्नुभयो “तपाईहरुको श्रम र पसिनाको जगमा अहिलेको पर्वतको राजनीति चलिरहेको छ । तपाईहरुले दिएकै जिम्मेवारी हामीले बोकिहेका छौं ।” आफ्नो थाकथलोलाई नबिर्सन समेत उहाँले आग्रह गर्नुभयो ।

कार्यक्रममा एमाले पोलिटब्यूरो सदस्य एवं चितवन इञ्चार्ज देवी ज्ञवालीले बसाईसराईलाई भयावह रुपमा हेर्न नहुने बताउनुभयो । बसाईसराई परापूर्व कालदेखि हुँदै आएको बताउँदै उहाँले भन्नुभयो “बाबु हुर्केको ठाउँमा म बसिन, म बसेको ठाउँमा मेरो छोरा बस्दैन ।” आर्थिक र सामाजिक प्रगतिका लागि मानिस बसाई सराई गरिरहने भन्दै उहाँले अहिले युरोपियनहरु दुबई लगायतका खाडी मुलुकमा काम गर्न आईरहेको उदाहरण प्रस्तुत गर्नुभयो ।

विगतमा अवसर खोज्दै चितवन झरेकाहरु अब अवसरका लागि पहाड फर्किने अवस्था आउँदै गरेको उहाँको भनाई थियो । उहाँले भन्नुभयो “अब व्यवसायिक कृषि गर्न सस्तो जमिन पहाडमा पाईन्छ, उहाँ बाँझो जमिन पनि छ त्यसलाई उपयोग गर्नुपर्छ ।” संकटबाट अवसर सिर्जना गर्नुपर्ने भन्दै उहाँले पर्वत चेतना र भौतिक पूर्वाधारका हिसाबले धेरै अगाडि बढेको बताउनुभयो ।

एमाले चितवनका अध्यक्ष कमल पाठकले मिसान ०८४ को लक्ष्य पूरा गर्न जहाँ भएपनि पार्टीलाई सहयोग गर्न आग्रह गर्नुभयो । पर्वत–चितवन सम्पर्क समाजमा एमाले मात्रै नभएर अरु पार्टीकालाई पनि कुरा बुझाएर भित्र्याउनु पर्ने उहाँको सुझाव थियो ।

एमाले पर्वतका अध्यक्ष गोविन्द पहाडीले “जहाँ शुभचिन्तक त्यहाँ पार्टी” भन्ने अभियानका साथ काठमाण्डौं, पोखरा, चितवन, नवलपरासी, बुटवल जस्ता शहरमा एमाले पर्वत जोडिंदै गएको बताउनुभयो । पर्वत र चितवनलाई सामाजिक, आर्थिक र बौद्धिक रुपमा कसरी जोड्न सकिन्छ भन्ने विषयमा छलफल गर्नुपर्ने भन्दै उहाँले पर्वतलाई चाहिने दक्ष जनशक्ति चितवनले दिन सक्नु पर्ने बताउनुभयो ।

एमाले केन्द्रीय सल्लाहकार परिषद् सदस्य तथा शिक्षाविद् रमाकान्त सापकोटाले बि.सं. २०१८ सालमा पर्वत जिल्ला बनेको भन्दै पर्वतकै कृष्णबम मल्लको अवधारणामा चितवन बनेको इतिहास कोट्याउनुभयो । एमाले गण्डकी प्रदेश सचिवालय सदस्य शान्त पौडेलले निर्वाचनमा एमालेलाई भोट हाल्दिन भन्ने एमाले हुन नसक्ने बताउनुभयो ।

कार्यक्रममा बागमती प्रदेश सभासद् हरि सापकोटा, टिकाराम भुषाल, एमाले गण्डकी प्रदेश सदस्य लालबहादुर अधिकारी, एमाले पर्वतका उपाध्यक्ष विमल लामिछाने, महाशिला गाउँपालिका अध्यक्ष ईश्वरी प्रसाद भुषाल लगायतले बोल्नु भएको थियो । पर्वत–चितवन सम्पर्क समाज तदर्थ समितिका संयोजक नेत्र पौडेलको अध्यक्षतामा उद्घाटन समारोह भएको हो ।

कार्यक्रममा एमालेका केन्द्र, प्रदेश तथा चितवन र पर्वत जिल्ला कमिटीका विभिन्न पदमा रहनु भएका नेता कार्यकर्ताहरुको बाक्लो उपस्थिति थियो ।