माधव सापकोटा
फागुन २४, चितवन
भरतपुर -४, धर्मचोक , लंकुस्थित लक्ष्मीवैकुण्ठनाथ मन्दिरको ५० औं ब्रह्मोत्सव एवम् मन्दिरद्वारा संचालित गुरुकुलको ३७ औं वार्षिकोत्सवका अवसरमा आयोजित “श्रीमद्भागवतज्ञानमहायज्ञसहित – साङ्ग श्रीलक्ष्मीवैकुण्ठनाथ स्वर्णब्रह्ममहोत्सव- २०८१”मा भोलि २५ गते भगवान्को रथयात्रा / सवारी हुने भएको छ ।
बिहान १० बजेदेखि भगवान्का विग्रहहरूसहित भजन- कीर्तनका साथ निक्लने रथयात्राले नगरपरिक्रमा गर्ने कार्यक्रम रहेको रथयात्रा संयोजक श्रीहरि कँडेलले बताउनुभयो। महोत्सवको चौथो दिन आज भएको नन्दोत्सव कार्यक्रममा उल्लेख्य भक्तजनहरूको सहभागिता रहेको थियो ।
महोत्सवअन्तर्गत फागुन २६ गते बिहान ९ बजेदेखि १०८ घडाद्वारा तिरुमन्जन,महाभिषेक ,कल्याणोत्सव, सामूहिक व्रतबन्ध,फागुन २७ गते तदीयाराधना / भण्डाराको कार्यक्रम रहेको छ।
मन्दिरका पीठाधीश स्वामी जगन्नाथाचार्यको संरक्षकत्व र लक्ष्मीनारायण मन्दिर पाङ् , पर्वतका पीठाधीश स्वामी डा. कमलनयनाचार्य रिजालको प्रधान आचार्यत्वमा चलिरहेको महोत्सवमा दैनिकरूपमा युवा कथावाचक गुरुकुलका पूर्व विद्यार्थी सन्तोष रामानुजदासले सङ्गीतमय श्रीमद्भागवत कथा- प्रवचन गरिरहनुभएको छ।
यसैबिच महोत्सवका अवसरमा मन्दिरस्थापनामा महत्त्वपूर्ण भूमिका निर्वाह गर्ने मन्दिरका संस्थापक टीकाराम सापकोटा “जैसी”, छविलाल रिजाल, धनेश्वर सापकोटा , चन्द्रदत्त अधिकारी, भुवानन्द खराल, भुवानन्द चालिसे र भूपतिदास सापकोटालाई सम्मान पत्र र दोसल्लाले सम्मान गरिएको छ।
