– बिनय आचार्य
चितवन, जेठ २७ –
निर्वाचन गरेर अर्बिट स्कुलमा विद्यार्थी नेतृत्व चयन गरिएको छ ।
आज शुक्रबार भएको विद्यार्थीहरुको निर्वाचनले स्कुल क्याप्टेनमा मिशन न्यौपाने र भाइस क्याप्टेनमा दिलिपकुमार शाह चयन भएका छन् । भरतपुर ५ विकास चोकमा रहेको अर्बिट स्कुलमै निर्वाचन गरिएको थियो ।
स्कुलका इन्चार्ज नारायण गौतमले विद्यार्थीहरुलाई प्रजातान्त्रिक अभ्यास गराउने उद्देश्यले निर्वाचनमार्फत नेतृत्व चयन गरिएको बताए । सहमति नभएर निर्वाचन गरिएको नभई उनले विद्यार्थीहरुलाई सिकाउनका लागि निर्वाचन गरिएको बताए ।
निर्वाचनमा कक्षा ४ देखि कक्षा १० सम्मका ३५८ जना विद्यार्थीहरुले मतदान गरेका थिए । १२ कक्षासम्म पढाइ हुने अर्बिटमा ११ र १२ को अहिले परीक्षा भइरहेकाले निर्वाचनमा सहभागी नगराइएको प्रिन्सिपल गौतमले बताए ।
अर्बिटमा आज भएको निर्वाचनले साँच्चै जनप्रतिनिधिको निर्वाचनकै झल्को दिएको थियो । निर्वाचनमा अर्बिट कलेजका स्काउटका विद्यार्थीहरुले स्वयमसेवकको भूमिका निभाएका थिए भने विद्यार्थीहरुलाई नै म्यादी प्रहरी घोषणा गरी प्रहरी झैं खटाइएको थियो भने शिक्षकशिक्षिकाबाट पर्यवेक्षकसहित निर्वाचन अधिकृत पनि तोकिएको थियो ।
