माधव सापकोटा
फागुन २० , चितवन
भरतपुर–४,धर्मचोक, लंकुस्थित
लक्ष्मीवैकुण्ठनाथ मन्दिरको ५० औं ब्रह्मोत्सव एवम् मन्दिरद्वारा संचालित गुरुकुलको ३७ औं वार्षिकोत्सवका अवसरमा फागुन २१ देखि २७ सम्म आयोजित “श्रीमद्भागवतज्ञानमहायज्ञसहित – साङ्ग श्रीलक्ष्मीवैकुण्ठनाथ स्वर्णब्रह्ममहोत्सव- २०८१” को
तयारी पूरा भएको छ। महोत्सवको भोलि २१ गते बिहान ११:३० बजे मुक्तिनाथ पीठाधीश्वर अनन्त श्रीविभूषित कमलनयनाचार्य श्रीजी महाराज ” मुक्तिनाथ बाबाले समुद्घाटन गर्ने कार्यक्रम रहेको मन्दिरका पीठाधीश स्वामी जगन्नाथाचार्यले बताउनुभयो।
उद्घाटन हुनुअघि बिहान १० बजेदेखि विभिन्न संघ–संस्थाको पहिचान झल्कने वेशभूषा, ब्यानर, ॐकार झण्डासहितको शोभा–कलशयात्राको कार्यक्रम रहेको शोभायात्रा संयोजक राधादेवी कंडेलले बताउनुभएको छ ।
मन्दिरका पीठाधीश स्वामी जगन्नाथाचार्यको संरक्षकत्व र लक्ष्मीनारायण मन्दिर पाङ् , पर्वतका पीठाधीश स्वामी डा. कमलनयनाचार्य रिजालको प्रधान आचार्यत्वमा सम्पन्न हुने महोत्सवमा युवा कथावाचक गुरुकुलका पूर्व विद्यार्थी सन्तोष रामानुजदासले सङ्गीतमय श्रीमद्भागवत कथा- प्रवचन गर्ने कार्यक्रम रहेको छ। यसैबिच महोत्सवको पूर्व सन्ध्यामा वे आज मोटर साइकल तथा गाडी र्याली सम्पन्न भएको छ।
वे ग्रुप नेपालका संस्थापक अध्यक्ष भोजनारायण कँडेलको नेतृत्वमा मन्दिर परिसरबाट निक्लेको र्यालीले
वैकुण्ठचोक- बेलचोक- सहिदचोक- चौबिसकोठी- त्रिचोक वैदिकनगर-पेन्सन क्याम्पचोक- धर्मचोक- अद्वैतचोक- आनन्दचोक- चाणक्य चोक-नवदुर्गाचोक- शीतलचोक- हरिकीर्तन चोक- अद्वैतचोक- धारापानीचोक- वैकुण्ठचोक परिक्रमा गर्दै
मन्दिरमा आएर समापन भएको थियो।
