काठमाडाैं फागुन १८,
युक्रेनी राष्ट्रपति भोलोदिमिर जेलन्स्की अमेरिकाबाट बेलायत पुगेका छन् । जेलन्स्कीको बेलायत भ्रमण अमेरिकी राष्ट्रपति डोनाल्ड ट्रम्पसँगको विवादास्पद भेटपछि भएको छ ।
भेटमा बेलायतका प्रधानमन्त्री किअर स्टार्मरले युक्रेनी राष्ट्रपति जेलन्स्कीलाई पूर्ण समर्थन प्रदान गर्ने घोषणा गरेका छन् । डाउनिङ स्ट्रीटमा भएको भेटमा, जेलन्स्कीले आफू र उनका देशका लागि यस्ता ‘मित्र’ पाएकोमा खुशी व्यक्त गरेका छन् ।
स्टार्मर र जेलन्स्कीले युक्रेनी सैन्य आपूर्ति सम्बन्धी २.२६ बिलियन बराबरको कर्जा सम्झौतामा हस्ताक्षर गरेका छन् । युक्रेनी राष्ट्रपति जेलन्स्कीले बेलायतको समर्थनको सराहना गर्दै, उक्त कर्जा रकमलाई युक्रेनी सैन्य आपूर्ति र हतियार निर्माणका लागि प्रयोग गर्ने बताए ।
बैठक पछिपछि प्रधानमन्त्री स्टार्मरले अमेरिकी राष्ट्रपति डोनाल्ड ट्रम्प र फ्रान्सका राष्ट्रपति इम्युएल म्याक्रोनसँग फोन संवाद गरेका छन् । यसका अतिरिक्त, प्रधानमन्त्रीले आइतबार लन्डनमा युरोपेली नेताहरूको सम्मेलन आयोजना गर्दै रूस-युक्रेन युद्धको समापनको प्रयासमा छलफल गर्नेछन् । यस अवसरमा जेलन्स्कीले बेलायतका राजा चार्ल्स तेस्रोसँग पनि भेट्नेछन् ।
अन्तर्राष्ट्रिय सम्बन्धमा पछिल्लो झगडाले अमेरिका र युरोपका बीचका सम्बन्धमा नयाँ चुनौती ल्याएको छ । बेलायतले आफूलाई अमेरिका र युरोपबीचको सेतुको रूपमा प्रस्तुत गर्दै ट्रम्प प्रशासनको युरोपीय सुरक्षा सन्देशसँग मिल्दोजुल्दो नीति अपनाएको छ ।
युक्रेनी राष्ट्रपति जेलन्स्कीले ओभल अफिसमा ट्रम्पसँगको विवादपछि अमेरिकासँगको सम्बन्ध सुधार्ने प्रयास गरेका छन्। उनले भनेका छन्, ‘हामी अझै पनि रणनीतिक साझेदार हौं, तर हामीलाई इमानदारीपूर्वक एक अर्कासँग कुरा गर्नुपर्छ ।’
बेलायती प्रधानमन्त्री स्टार्मरले युक्रेनी सैन्य सहयोगका लागि अमेरिकी सुरक्षा ग्यारेन्टीको माग गर्दै, ट्रम्प र जेलन्स्कीलाई फोन गरेर आफ्नो मध्यस्थता प्रस्तुत गरेका थिए ।
