चितवन, माघ २४ –
चितवनको पर्यटकीय नगरी सौराहा क्षेत्रमा आतङ्क मच्चाउँदै आएको जङ्गली हात्ती मकुनाको मृत्यु भएको छ ।
मानव बस्तीमा निस्एिका बेला निकुञ्जतर्फ धपाउने क्रममा सुरक्षार्थ खटिएका सेनाको गोली लागेर हात्तीको मृत्यु भएको चितवन राष्ट्रिय निकुञ्जका प्रमुख संरक्षण अधिकृत डा. गणेश पन्तले जानकारी दिए ।
यो हात्ती केही समययता मानव बस्ती वरपर निस्किएर दुःख दिइरहेको थियो । सधैँ यसलाई हात्ती लगाएर जङ्गलतर्फ खेद्ने गर्थेउँ, यो पटक यसरी नै जङ्गल पठाउन लाग्दा एक्कासि सेना चढेको हात्तीलाई नै आक्रमण गर्दा सुरक्षाकर्मीले असुरक्षित अवस्था भएपछि आत्मरक्षाका लागि नेपाली सेनाले चलाएको गोली लागेर जंगली हात्ती मकुनाको मृत्यु भएको होू, प्रमुख सरक्षण अधिकृत डा पन्तले भने ।
चितवन राष्ट्रिय निकुञ्जको सौराहा सेक्टरमा पर्ने कुमरोज मध्यवर्ती सामुदायिक वनको लामिताल क्षेत्रमा बुधबार दिउँसो गोली लागेर हात्तीको मृत्यु भएको हो । निकुञ्जका अनुसार गत असोजदेखि मकुना मानव बस्तीमा पसेर स्थानीयलाई आतंकित बनाउदै आएको थियो ।
पटक पटक मकुनालाई बस्तीमा पसेको बेला निकुञ्जका हात्तीको सहयोगमा लखेटेर जंगल पठाउँदै आइएको थियो ।
बुधबार दिउँसो मानव बस्ती प्रवेश गर्न लागेको सुचना पाएपछि लखेटेर कोर एरियामा पठाउनका गएको नयाँ गोरख गण (क) गुल्म सौराहाका नेपाली सेना र निकुञ्जका हात्ती गस्ती टोलीलाईनै आक्रमण गर्न आउने क्रममा चुरेगज हात्तीलाई मकुनाले आक्रमणको प्रयास गरेको थियो । त्यसपछि दुई राउण्ड हवाई फायर गरिएको र त्यसवाट पनि हात्ती नभागेर दोस्रो हात्ती खगेन्द्र प्रसादलाई आक्रमण गरेको निकुञ्जले जनाएको छ ।
सो अवसरमा रेन्जर श्याम तामाङ हात्तीबाट भुईंमा खसेपछि आत्मरक्षाका लागि निकुञ्ज सुरक्षाकर्मीले बाध्यताले गोली चलाउन परेको निकुञ्जले विज्ञप्ति जारी गरेर जनाएको छ ।
राष्ट्रिय निकुञ्ज तथा वन्यजन्तु संरक्षण ऐन, २०२९ को दफा २१ मा आत्मरक्षाका लागि गोली चलाउनु पर्ने बाध्यात्मक अवस्था आएमा निकुञ्ज सुरक्षाकरमीलाई गोली चलाउन पाउने अधिकार उल्लेख गरेको छ ।
मानव बस्तीमा निस्किएर केही भौतिक संरचनामा क्षति पुर्याए पनि यो हात्तीका कारण अहिलेसम्म मानवीय क्षति भने भएको छैन ।
