भरतपुर, माघ ०७-
भरतपुर महानगरपालिका वडा नम्वर-२ ले ८० वर्षमाथिका १५० भन्दा बढी ज्येष्ठ नागरिकलाई सम्मान गरेको छ । भरतपुर–२ का वडाध्यक्ष मनोज रानाभाटले ज्येष्ठ नागरिकलाई सम्मान गर्ने कार्यक्रमअन्तर्गत न्यानो कपडा (फाइबरको सिरक) वितरण गरेका हुन् ।
‘भरतपुर–२ मा ज्येष्ठ नागरिकलाई सम्मान गर्ने संस्कृतिको विकास वडा कार्यालयबाट सुरू भएको छ’, वडाध्यक्ष रानाभाटले भने । उनका अनुसार वडाका १८ वटा टोलका ज्येष्ठ नागरिकहरुलाई चिसो मौसममा फाइबरको सिरक वितरण गरिएको हो । यसका साथै ज्येष्ठ नागरिकलाई फलफूल तथा प्रसाद ग्रहण गराइएको थियो । कार्यक्रममा ज्येष्ठ नागरिकको स्वास्थ्य जाँचसमेत गरिएको थियो ।
सम्मानपछि ज्येष्ठ नागरिक दधिराम पौडेलले वडा कार्यालयप्रति आभार प्रकट गर्दै यस्ता कार्यक्रमलाई निरन्तरता दिन आग्रह गरेका छन् । उनले भने, ‘ज्येष्ठ नागरिकलाई सम्मान गर्ने संस्कार वडाले सुरू गरेको छ, हामीलाई खुसी लागेको छ ।’
अर्का ज्येष्ठ नागरिक गोपीमान श्रेष्ठले वडाले ज्येष्ठ नागरिकलाई सम्मान गरेर आशीर्वाद लिने काम सराहनीय भएको बताए । उनले स्वास्थ्य जाँच गरेर ज्येष्ठ नागरिकको दीर्घजीवनको कामना गर्ने काम वडाबाट सुरू भएको बताउँदै यस्ता कार्यक्रमलाई निरन्तरता दिनुपर्ने जानकारी दिए ।
वडा सदस्य बलराम सिटौलाले ज्येष्ठ नागरिकको सूची उतारेका थिए । न्यानो कपडा वितरणमा अन्य वडाका सदस्यहरु बेलपत्र श्रेष्ठ, परशुराम पौडेल र उर्वशी तोलाङ गोतामेको उपस्थिति थियो ।
