काठमाडाैं, माघ ५ –
इजरायल सरकारले हमाससँगको युद्धविराम र बन्धक मुक्ति सम्झौतालाई अनुमोदन गरेको छ । इजरायलको मन्त्रिपरिद्ले अनुमोदन गरेसँगै अब आइतबारदेखि सम्झौता लागू हुने छ ।
राति अबेरसम्म चलेको लामो छलफलपछि सम्झौता अनुमोदन गरिएको बीबीसीले जनाएको छ ।
दुई मन्त्रीहरूले भने सम्झौताको विरुद्धमा मतदान गरेका छन्। यसअघि सुरक्षा मन्त्रिपरिषद्ले पहिले सम्झौतालाई अनुमोदन गर्न सिफारिस गरेको थियो ।
सम्झौता अनुसार युद्धविरामको पहिलो चरण ४२ दिनको हुनेछ। पहिलो चरणमा हमासले ३३ इजरायली बन्धकहरूलाई रिहा गर्नेछ। बदलाम, इजरायलले २५० हमास कैदीहरूलाई पनि रिहा गर्नेछ। साथै, इजरायली सेना गाजा सीमाबाट ७०० मिटर फर्कनेछ।
पहिलो चरणको बन्धक रिहा भएको १५ दिनपछि हमासले बाँकी बन्धकहरूलाई रिहा गर्नेछ। यसैबीच, दुवै पक्षले स्थायी युद्धविरामबारे छलफल गर्नेछन् ।
कतारको राजधानी दोहामा विगत केही हप्तादेखि युद्धविरामको लागि वार्ता भइरहेको थियो। यस वार्तामा इजिप्ट र अमेरिका पनि संलग्न थिए।
