काठमाडाैं, पुस २८ –
अमेरिकाको लस एन्जलसको ठूलो क्षेत्रमा आगलागी हुँदा हालसम्म ११ जनाको ज्यान गइसकेको छ भने बाहिर आएका तस्वीरहरूले यो विनाश कति ठूलो छ भन्ने देखाउँछन्। प्रशासनले मृतकको संख्या अझै बढ्नसक्ने आशंका गरेको छ।
सयौं घरहरू पूर्ण रूपमा ध्वस्त भएका छन् । जलेर कारका केवल ढाँचामात्र बाँकी छन्, एटीएमहरू पग्लिएका छन् र तीव्र हावाका कारण रूखहरू ढलेका छन्।
लस एन्जलसका अधिकारीहरूले स्थानीय स्वास्थ्य आपतकाल घोषणा गर्दै हावाको गुणस्तर अत्यन्त खराब रहेको बताएका छन्। यहाँको आकाश खरानीका साना कण र धूवाँको तहले ढाकिएको छ।
लस एन्जलसमा सयौं भवनहरू ध्वस्त भइसकेका छन् र दशौं हजार मानिसलाई त्यो क्षेत्रबाट सुरक्षित स्थानमा सारिएको छ।
हालसमम आगो निभाउन हजारौं दमकलकर्मीहरू खटिएका छन्, तर कैयौं ठाउँमा अझै आगोलाई नियन्त्रणमा लिन नसकिएको जानकारी आएको छ।
त्यहाँ दुई लाख घरमा अहिले विद्युत् छैन।
लस एन्जलस काउन्टीका शेरिफ रोबर्ट लुनाले भने, ‘यो क्षेत्रमा मानौं कसैले बम खसालेजस्तो देखिन्छ।’
प्यासिफिक प्यालिसेडमा आफ्नो जलेको घरको अगाडि उभिएका ग्रेग च्याम्पियनले पनि यस्तै धारणा राखे। उनले भने, ‘यहाँको अवस्था यस्तो छ, मानौं यहाँ बम खसेको हो।’
विशेषज्ञहरूले मौसम र जलवायु परिवर्तनका अन्तर्निहित प्रभावहरूले आगामी दिनहरूमा पनि आगलागीका घटनाहरूलाई बढावा दिन सक्ने चेतावनी दिएका छन्। साथै, यस आपत्तिको तयारीमा कमजोरीका लागि अधिकारीहरूले कडा आलोचना सामना गर्नुपरेको छ।
अमेरिकालाई सहयोग गर्न क्यानाडाली सरकारले पहल गरेको छ। आगो निभाउन मद्दत पुर्याउन क्यानाडाले दमकलकर्मीहरू र विशेष उपकरणहरू पठाउँदैछ।
ताजा अपडेट के छ?
लस एन्जलसको इतिहासकै सबैभन्दा विनाशकारी मानिएको यस आगलागीमा हालसम्म १० हजार भन्दा बढी भवनहरू जलेर खरानी भएका छन्।
६० हजार अन्य भवनहरू जोखिममा छन्। बीमा अन्तर्गत पर्ने कूल सम्पत्तिको क्षति ८ अर्ब डलरभन्दा बढी हुने अनुमान गरिएको छ, किनभने यहाँका धेरै महँगा सम्पत्तिहरूलाई क्षति पुगेको छ।
सेलिब्रिटीहरूको घर पनि नष्ट भएको छ । तिनमा एन्थोनी हप्किन्स, मेल गिब्सन, लिटन मेस्टर, एडम ब्रोडी, जेम्स वुड्स र पेरिस हिल्टन लगायत छन् ।
पेरिस हिल्टनले मालिबुस्थित आफ्नो घर यस आगलागीमा गुमाएकी छिन्। उनले आगलागीका कारण विस्थापित भएकाहरूलाई सहयोग गर्न आपतकालीन कोष स्थापना गर्ने घोषणा गर्दै त्यसका लागि एक लाख डलर दान गरिसकेकी छिन्।
लस एन्जलस काउन्टीमा शुक्रबार करिब एक लाख ४४ हजार मानिसलाई आफ्नो घर खाली गर्न आदेश दिइएको थियो। तीमध्ये अधिकांशले आफूले बोक्न सक्ने कुरा लिएर घर छोडेका छन्।
यसबाहेक, १.६६ लाख मानिसलाई चेतावनी दिइएको छ कि चाँडै नै उनीहरूलाई पनि आफ्नो घर छोड्नुपर्ने हुन सक्छ। – एजेन्सी
