चितवन, पुस १४-
भरतपुर भ्रमण वर्षको वार्षिक उत्सवका अवसरमा भरतपुर महानगरले विद्यार्थीहरुलाई सहभागि गराउन खोजेको प्रति नेपाल विद्यार्थी संघ (नेविसंघ) चितवन र अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) चितवनले विरोध जनाएको छ ।
भरतपुर महानगरपालिकाले भ्रमण वर्ष २०२४ को पर्यटन सम्बन्धी विभिन्न कार्यक्रमहरु संचालन गर्न भरतपुर महानगर भित्रका विद्यालयको पठनपाठन नै बन्द गरि विद्यार्थी सहभागिता गराउन लागेपछि नेविसंघ चितवन र अनेरास्ववियु चितवनले त्यसको विरोध गरेको हो ।
अनेरास्ववियु चितवनका अध्यक्ष हरि आचार्य र नेविसंघ चितवनका कार्यवाहक अध्यक्ष प्रकाश भण्डारीले भरतपुर महानगरपालिका प्रमुख रेनु दाहाललाई ज्ञापन पत्र बुझाउँदै, ‘विद्यार्थीहरुले पढ्न पाउने संविधानले व्यवस्था गरेको नैसर्गिक अधिकारको समेत उल्लङ्घन हुने गरी विद्यालय ठप्प गरेर ऱ्याली तथा सभामा सहभागिता नगराउनु हुन अनुरोध गर्दछौं । यसरी शैक्षिक संस्थाण सिधै प्रभाव पार्ने किसिमको राजनैतिक गतिविधिले विद्यार्थीहरुको उज्ववल भविष्य माथि प्रहार हुने हाम्रो ठम्याई रहेको छ । यसरी ह्विप जारी हुने गरि विद्यार्थीहरुको मानसपटलमा असर पर्ने खालको गतिविधि तत्काल रोकि विद्यालयमा पठनपाठन स्वतन्त्र रुपले संचालनको उपयुक्त वातावरण निर्माणका लागि अनुरोध गरेका छन् ।’
भरतपुर महानगरपालिकाले सुरु गरेको भरतपुर भ्रमण वर्ष २०२४ लाई यही पुष १६ गते समापन गरिँदैछ । उक्त दिनलाई महानगरले भरतपुर भ्रमण वर्षको वार्षिक उत्सवका रुपमा मनाउन लागेको छ ।
भरतपुर २७ मेघौलीमा जारी राष्ट्रिय रैथाने खाना महोत्सवको अन्तिम दिन पारेर सोही स्थानमा महानगरले भ्रमण वर्षको वार्षिक उत्सव मनाउन लागेको छ ।
