चितवन, कात्तिक १२
भरतपुरमा रहेको सनराइज इङ्लिस सेकेण्डरी स्कुलले विद्यालयको ३७औँ वार्षिकोत्सको अवसरमा सोमबार चितवन जिल्लाव्यापी माध्यमिक विद्यालयस्तरीय कविता प्रतियोगिता सम्पन्न गरेको छ ।
महाकवि लक्ष्मीप्रसाद देवकोटाको ११६औँ जन्मजयन्तीको सन्दर्भ पारेर गरेको प्रतियोगितामा गार्गी कन्या गुरुकुलमकी छात्रा चेतना वाग्ले प्रथम भएकी छन् । २० वटा विद्यालयका ३५ जना सहभागीबिचको प्रतिस्पर्धामा वाग्ले प्रथम भएकी हुन् ।
प्रतियोगितामा अङ्कुरम् एकेडेमीका छात्र सोहम अधिकारी दोस्रो, ग्लोरियस एकेडेमीकी छात्रा रश्मी गुरुङ तेस्रो र बालकुमारी बोर्डिङ स्कुलका छात्र आभास लामिछाने चौथो भएका छन् । विजेताहरुलाई शिल्ड र प्रमाणपत्र एवं सहभागी सबै जनालाई प्रमाणपत्र दिइएको थियो ।
विद्यालय व्यवस्थापन समितिका अध्यक्ष रामजीप्रसाद अर्यालको अध्यक्षतामा सम्पन्न कार्यक्रमको प्रमुख अतिथि साहित्यकार धनराज गिरी रहेका थिए ।
साहित्यकारहरु कपिल अज्ञात, रमेश प्रभात र विद्या भण्डारी चिराग निर्णायक रहेको उक्त प्रतियोगिताको संयोजन विद्यालयको नेपाली विभागका प्रमुख छविरमण न्यौपानेले गरेका थिए । कार्यक्रमको सञ्चालन शिक्षिका नानीमाया सापकोटाले गरेकी थिइन् ।
