आकांक्षा पोख्रेल-
चितवन, ११ कात्तिक
पूर्व गृहमन्त्री एवं पार्टी सभापति रवि लामिछानेलाई पक्राउ गरेको विरोधमा चितवनमा राष्ट्रिय स्वतन्त्र पार्टी (रास्वपा)को आन्दोलन जारी छ । आइतबार भरतपुरको चौबिसकोठीबाट सुरु भएको र्याली बाइपास भएर हाकिम चोक हुँदै पुन चौबिसकोठीमा आएर समापन भएको हो।
आज भने रास्वपाको आन्दोलन अलि फरक किसिमको देखिएको छ । आन्दोलनमा प्रदर्शंकारिहरु ‘देश बचाउ बचाउ’ भन्दै सडकमा भागदौड गरेका थिए ।
सरकार विरुद्दको विरोध प्रदर्शनमा सहभागीहरूले ‘असली सहकारी ठगलाई कारबाही गर’, ‘सहकारी पीडितलाई न्याय दे’, ‘कर छल्नेलाई कारबाही गर’, ‘मिडिया ट्रायल बन्द गर’, ‘माफियाहरूलाई कारवाही गर’, ‘भ्रष्ट सरकार मुर्दावाद’, ‘नडराउ रवि दाई-जनता तिम्रो साथमा छ’, ‘रवि दाइ हाइ हाइ’ लगायतका नारा लगाए ।
कार्यक्रममा केन्द्रिय सदस्य सबिना विकले कार्यक्रममा सम्बोधन गर्दै न्यायप्रेमी जनता एकजुट भएर लाग्नुपर्ने बताइन्। राजनीतिक प्रतिशोधका आधारमा पार्टी सभापति लामिछानेलाई फ़साइएको उनको आरोप छ।
भरतपुर महानगर सभापति सिता ज्ञवालीले रवि सहकारी ठगीमा संलग्न नभएको बताइन्। उनले असली सहकारी ठगलाई बचाउन निर्दोष रवि फ़साइएको उल्लेख गरिन्। उनले सहकारीपीडितलाई न्याय दिलाउने काममा रास्वपाले नेतृत्व लिन तयार रहेकोसमेत बताइन् ।
जिल्ला सभापति कृष्ण प्रसाद भुसालले देशमा भएको बेथितिको विरूद्धमा सबै एकजुट हुन आग्रह गरे। नयाँ शक्तिको रुपमा उदाएको पार्टीसँग ठूला दल डराएको उनले बताए । सरकारविरुद्द रास्वपा चितवनले निरन्तर आन्दोलन गर्ने सभापति भुसालले बताए ।
रास्वपा चितवनले नियतवस पार्टी सभापति लामिछानेलाई पक्राउ गरेको भन्दै निरन्तर शान्तिपूर्ण आन्दोलन गर्दै आएको छ । राजनीतिक प्रतिशोधका विरूद्धमा ऐक्यबद्धता रास्वपा चितवनले आग्रह गरेको छ ।
सहकारी ठगी प्रकरणमा कास्की जिल्ला अदालतले रास्वपा सभापति लामिछानेविरुद्ध प्रहरीलाई पक्राउ गर्ने अनुमति दिएपछि प्रहरीले गत शुक्रबार साँझ पार्टी केन्द्रीय कार्यालयबाट पक्राउ गरेको थियो । त्यस लगत्तै रास्वपाले ७ वटै प्रदेशमा सरकार विरुद्द बिरोध प्रदर्शन गर्दै आएको छ ।
