चितवन, ०८ कात्तिक
पूर्वगृहमन्त्री एवं पार्टी सभापति रवि लामिछानेलाई पक्राउ गरेको विरोधमा रास्वपा चितवनले आज पनि बिरोध प्रदर्शन गरेको छ। राजनीतिक प्रतिशोधका आधारमा लामिछानेलाई पक्राउ गरेको भन्दै रास्वपाले बिहिबार प्रदर्शन गरेको हो।
एयरपोर्ट गेट अगाडिबाट सुरु गरिएको र्याली हाकिम चोक हुँदै जिल्ला प्रशासन कार्यालय पुगि नारा लगाउँदै चौबिसकोठी आएर समापन गरिएको हो।
प्रदर्शनमा सहभागीहरूले ‘असली सहकारी ठगलाई कारबाही गर’, ‘सहकारी पीडितलाई न्याय दे’, ‘कर छल्नेलाई कारबाही गर’, ‘मिडिया ट्रायल बन्द गर’, ‘माफियाहरूलाई कारवाही गर’, ‘भ्रष्ट सरकार मुर्दावाद’, ‘नडराउ रवि दाई-जनता तिम्रो साथमा छ’, ‘रवि दाइ हाइ हाइ’ लगायतका नारा लगाए ।
कार्यक्रममा केन्द्रिय सदस्य धुर्व गिरिले नियतवस पार्टी सभापति लामिछानेलाई पक्राउ गरिएको बताए। सरकारको गलत कदम विरुद्द सबै एकजुट हुन उनले आग्रह गरे। उनले निष्पक्ष र स्वतन्त्र अनुसन्धान हुनुपर्ने बताए। सहकारी प्रकरणमा सत्तारुढ पार्टीका व्यक्तिलाई छोड्ने र रवि लामिछानेलाई मात्र कारबाहीको दायरामा ल्याउनु भेदभाव देखिएको उनको भनाइ छ ।
रास्वपा बागमती प्रदेश सदस्य राधिका तिमल्सिनाले कार्यक्रमलाई सम्बोधन गर्दै सरकारले राजनीतिक प्रतिशोध साँधेर रविलाई पक्राउ गरिएको बताइन्। उनले समय नपुगी चितवनको सिडिओ र एसपी सरुवा गरिएको भन्दै विरोध पनि जनाइन्।
मंगलबार पूर्वगृहमन्त्री रवि लामिछाने पक्राउको विरोधमा चितवनको भरतपुरमा रास्वपाले शवको प्रतिक बनाएर नारायणीमा विसर्जन गरेको थियो । सो विरोधलाई प्रजिअ र एसपीले रोक्न नसकेको भन्दै गृह मन्त्रालयले विश्लेषण गरेको छ।
रास्वपाले भने नियतवस पार्टी सभापति लामिछानेलाई पक्राउ गरेको भन्दै निरन्तर आन्दोलन गर्ने जनाएको छ । आज रास्वपाले पोखरामा पत्रकार सम्मेलन गर्दै अब काठमाडौं केन्द्रित आन्दोलन गर्ने बताएको छ।
