चितवन, १५ असोज
राष्ट्रिय स्वतन्त्र पार्टी (रास्वपा) भरतपुर महानगर कमिटिले चाडबाडमा हुने कालोबजारी नियन्त्रण गर्न ध्यानकर्षण पत्र बुझाएको छ । मंगलबार महानगर सभापति सिता ज्ञवालीसहितको टोलीले भरतपुर महानगर प्रमुख रेणु दाहाललाई पत्र बुझाएको हो ।
सभापति ज्ञवालीद्वारा जारी ध्यानकर्षण पत्रमा भनिएको छ, “नेपालीहरुको चाडपर्व नजिकीदै गरेको अवसर पारेर दैनिक उपभोग्य सामानको अनआवश्यक संचयगरी बजारमा कृतिम अभाव श्रृजना गरिएको, कालो बजारले प्रसय पाएको, भ्रमपूर्ण विज्ञापन गरी उपभोक्तालाई झुक्याउने प्रयास गरिएको, मुल्यसूचि स्पष्ट नराखिएको, चाडपर्वको मौका छोपी चरम मूल्यवृद्धि गरिएको, बिल बिजक जारी नभएको वस्तु तथा सेवाको ग्यारेन्टी वारेण्टीको प्रत्याभूति नगरिएको लगायतका व्यापक जनगुनासो प्राप्त हुन आएकोले गुणस्तरीय वस्तु तथा सेवा प्राप्त गर्ने उपभोक्ताको संवैधानिक हकको संरक्षण तथा संवद्र्धन गर्न, उपभोक्तालाई प्रचलित कानुन बमाजिमको प्राप्त हकको प्रचलनको सुनिश्चिताको, वस्तु तथा सेवाको सहज आपूर्ति, मुल्य, परिणाम, शुद्धता, गुणस्तर र मापदण्डको सुनिश्चिता मानव स्वास्थ्यमा प्रत्यक्ष असर पर्ने अखाद्य तत्वको मिसावटको नियन्त्रण गर्ने विषयमा राज्यको उपस्थितीको आम उपभोक्ता तथा नागरिकले महसुस गर्न नपाएको प्रति राष्ट्रिय स्वतन्त्र पार्टीको गम्भीर ध्यानाकर्षण भएको छ ।”
चाडबाडका समयमा अत्यावश्यक खाद्य सामग्रीलगायतमा मूल्यवृद्धि भइ आम जनता त्यसको मारमा पर्न सक्ने भन्दै त्यस्ता गतिविधमा समयमै ध्यान पुर्याउन नगरप्रमुख दाहाललाई रास्वपा भरतपुरले ध्यानकर्षण गराएको हो ।
त्यस्तै, महानगरभित्र भएका फोहोरहरु व्यवस्थापन, स्थानीय उत्पादनलाई प्रोत्साहन, दुर्घटना न्यूनीकरण र सुरक्षा व्यवस्था कडा पार्न लगायतका विषयमा प्रमुख दाहालको ध्यानकर्षण गराएको सभापति ज्ञवालीले जानकारी दिइन् । महानगरभित्र रहेका स्कुलका ड्रेसहरु सिमित व्यवसायीहरुको पसलमा मात्र पाइने जनगुनासो आएपछि यस विषयमा पनि बजार अनुगमन गरि ड्रेस सबै पसलहरु पाइने व्यवस्था गर्न रास्वपा भरतपुरले नगरप्रमुख दाहाललाई आग्रह गरेको छ।
चाडबाड नजिकिएसँगै कालोबजारी र महँगी बढ्ने भएकाले त्यसलाई समयमै नियन्त्रण गर्न रास्वपा भरतपुरले माग गरेको सभापति ज्ञवालीले बताइन् ।
चाडबाडमा हुने मूल्यवृद्धि र कालोबजारी नियन्त्रण गर्न रास्वपाले देशभरका जिल्ला प्रशासन र पालिकाहरुमा ध्यानाकर्षण गराएको छ।
