चितवन, भदौं १५
नेपाल राष्ट्रिय दलित समाज कल्याण संघ चितवनको ४२ औं साधारणसभा तथा नवौं जिल्ला अधिवेशनबाट अध्यक्षमा पुनः कृष्ण परियार निर्विरोध निर्वाचित भएका छन् । आगामी पाँच वर्षे कार्यकालका लागि उनी अध्यक्ष पदमा निर्विरोध निर्वाचित भएका हुन् ।
उनी संगै सदस्य पदहरुमा तारा कुमारी विश्वकर्मा (माडी), रमिता परियार(राप्ती), सरोज उपरकोटी (भरतपुर), नानीमया विश्वकर्मा (भरतपुर), धर्मराज विश्वकर्मा(भरतपुर) निर्विरोध निर्वाचित भएका हुन् । नवनिर्वाचित कार्यसमितिको पहिलो बैठकले पदाधिकारी सहित मनोनित सदस्यहरु चयन गरि कार्यसमितिलाई पूर्णता दिनेछ ।
नवनिर्वाचित कार्यसमितिलाई निर्वाचन समितिका संयोजक चक्र रुचालले टिका र निर्वाचन समितिका सदस्य विजयकुमार विश्वकर्माले खादा प्रदान गरेका थिए ।
नेपाल राष्ट्रिय दलित समाज कल्याण संघ चितवन दलित समुदायको उत्थान र उन्नयनका लागि २०३९ सालदेखि जिल्लामा सक्रिय रहेको छ । समाजका अध्यक्ष कृष्ण परियारको अध्यक्षतामा संचालन भएको साधारणसभामा समाजका केन्द्रीय उपाध्यक्ष मनबहादुर विश्वकर्माको प्रमुख आतिथ्यता रहेको थियो । साधारणसभामा समाजका सचिव प्रेम कुमार सुनारले प्रगति प्रतिवेदन र कोषाध्यक्ष तेजेन्द्र बहादुर विश्वकर्माले आर्थिक प्रतिवेदन प्रस्तुत गरेका थिए ।
