चितवन, साउन २३–
एक्सपर्ट एजुकेशन एण्ड भिजा सर्भिसेजको २१औं वार्षिकोत्सवको अवसरमा आज (बुधबार) देवघाटमा आश्रित वृद्धवृद्धाहरुलाई साँझको भोजन ग्रहण गराइएको छ ।
तनहुँको देवघाटस्थित देवघाट क्षेत्र विकास समितिद्धारा संचालित देवघाट समाज कल्याण केन्द्रमा आश्रित असाहय वृद्धवृद्धाहरुलाई एक्सपर्टले भोजन ग्रहण गराउनुको साथै फलफूल र लत्ताकपडा वितरण गरेको छ । एक्सपर्ट चितवनका अध्यक्ष घननाथ अर्याल, प्रबन्ध निर्देशक डिल्लीराम अधिकारीलगायतले वृद्धृवद्धाहरुलाई फलफूल तथा लत्ताकपडा वितरण गरेका थिए ।
सो क्रममा बोल्दै प्रबन्ध निर्देशक डिल्लीराम अधिकारीले २२औं वर्षमा प्रवेशको पूर्वसन्ध्यामा आमाबुबाबाट आर्शिबाद लिदै भोजन ग्रहण, फलफूल र लत्ताकपडा वितरण गरिएको बताए । उनले वार्षिकोत्सवको अवसरमा विभिन्न कार्यक्रम गर्दै आएकोमा असाहय वृद्धवृद्धालाई ध्यानमा राखेर यो कार्यक्रम गर्दै आइरहेको बताए ।
एक्सपर्ट चितवनका अध्यक्ष घननाथ अर्यालले वृद्धवृद्धालाई सेवा गर्ने सबै हातलाई धन्यवाद दिए । उनले संस्थाको तर्फबाट सकेको सहयोग गर्ने प्रतिवद्धता जनाए ।
देवघाट क्षेत्र विकास समितिका सूचना अधिकारी पुष्पराज पौडेलले दाताहरुकै सहयोगबाट आश्रम संचालन भइरहेको बताए । उनले हेर्ने मान्छे नभएर या अन्य समस्याले एक्लो भएका वृद्धवृद्धालाई नभई विल्कुलै असाहय वृद्धवृद्धालाई मात्रै राख्ने गरिएको बताए ।
एक्सपर्टले वार्षिकोत्सवको अवसरमा मंगलबार एक्सपर्ट बेस क्याम्पमा निःशुल्क आँखा परीक्षण शिविर गरेको थियो । त्यस्तै अन्तर स्कुल/कलेज एक्सपर्ट फुटसल फेस्टा कार्यक्रम समेत सम्पन्न भइसकेको छ । एक्सपर्ट एजुकेशनले भोलि (बिहीबार) अर्थात् अगष्ट ८ का दिन भव्य समारोहकाबीच २१औं वार्षिकोत्सव समारोह मनाउँदैछ ।
वार्षिकोत्सवको दिन भोलि बिहीबार विहान ७ रत्ननगरस्थित एक्सपर्ट कार्यालय परिसरमा वृहत खुल्ला रक्तदान कार्यक्रम आयोजना गरिएको छ भने दिउँसो १ बजे एक्सपर्ट बेस क्याम्प भरतपुरमा वार्षिकोत्सव मुल समारोह कार्यक्रम हुनेछ । सो समारोहमा ‘एक्सपर्ट राष्ट्रिय पत्रकारिता पुरस्कार’, विविध प्रतियोगिताका विजेताहरुलाई पुरस्कार वितरणलगायतका कार्यक्रम हुनेछ ।
सन् २००३ अगष्ट ८ मा अष्ट्रेलियाको सिड्नीमा एक्सपर्टको जन्म भएको थियो । एक्सपर्टका हाल २० देशमा ६० भन्दा बढी शाखाहरु रहेका छन् । चितवनमा मात्र एक्सपर्टको भरतपुर, रत्ननगर र पर्सामा गरी तीन अफिस छन् । एक्सपर्टले मुख्यगरी उच्च शिक्षा अध्ययनका लागि विदेश जान चाहने विद्यार्थीहरुलाई अष्ट्रेलिया, क्यानडा, अमेरिका, युके, न्यूजील्याण्ड, आयरल्याण्डका लागि शैक्षिक परामर्श दिँदै आइरहेको छ । एक्सपर्टले परामर्शसंगै आइइएलटिएस/पीटीइ र स्याट कक्षाहरुसमेत संचालन गर्दै आइरहेको छ ।
