चितवन, ६ असार
श्री एयरलाइन्सको विमानद्वारा भरतपुर विमानस्थलमा सफल परीक्षण उडान सफल भएको छ । श्री एयरलाइन्सको ८० सिटे जहाज आज काठमाडौँबाट भरतपुर विमानस्थलमा सफल अवतरण भएको हो ।
सफल अवतरण पश्चात उक्त जहाज पुनः काठमाडौँ गएको हो । क्यानडाको तत्कालीन बम्बार्डियर (हाल डी हाभिलैण्ड अफ क्यानडा) कम्पनीमा निर्मित ८० सिट क्षमताको क्यु ४०० ड्यास ८ बाट पहिलोपटक भरतपुरमा सफल परीक्षण उडान गरेको हो ।
जहाज परीक्षणको निरीक्षण गर्न उपप्रधानम तथा गृहमन्त्री रवि लामिछाने र पर्यटनमन्त्री हितबहादुर तामाङ भरतपुर आएका थिए । उडान परीक्षणका क्रममा कुनै समस्या नभएको श्री एयरलाइन्सका प्रबन्ध निर्देशक सुधिर मितलले बताए ।
पहिलो पटक भरतपुर विमानस्थलमा परीक्षण उडान गरेको कम्पनीले नियामक नेपाल नागरिक उड्डयन प्राधिकरणबाट स्वीकृति पाए पश्चात् उक्त गन्तव्यमा छिट्टै नियमित उडान सञ्चालन गरिने श्री एयरलाइन्सले जानकारी दिएको छ ।
