चितवन, बैशाख १७ –
विज्ञापन कर न तिर्ने राष्ट्रिय तथा अन्तर्राष्ट्रिय कम्पनीको विज्ञापनजन्य बोर्डहरु भरतपुरबाट हटाउने क्रम जारी छ ।
विभिन्न कम्पनीले भरतपुरका विभिन्न पसल र सडकहरुमा विज्ञापनजन्य बोर्ड राखेर आफ्नो विज्ञापन गरिरहेका छन् । त्यसबापतको विज्ञापन कर महानगरपालिकालाई कम्पनीहरुले तिर्नुपर्छ । तर केही कम्पनीहरुले विगत तीन वर्षदेखि कर तिरेका छैनन् ।
ती कर न तिर्ने कम्पनीको बोर्डहरु महानगरपालिका र प्रनिश कन्स्ट्रक्सनले हटाउन थालेको हो ।
भरतपुरमा कर उठाउने जिम्मा पाएको प्रनिश कन्स्ट्रक्सनले पटकपटक ताकेता गर्दा पनि कर तिर्न अटेर गरेपछि बोर्ड हटाउन सुरु गरिएको जनाइएको छ ।
विगत दुई दिनदेखि नारायणगढ बजारस्थित पूर्वपश्चिम राजमार्ग वरिपरिका पसलबाट बोर्डहरु हटाउन थालिएको प्रनिश कन्स्ट्रक्सनका प्रतिनिधि दिपक घिमिरेले जानकारी दिए ।
सिजी, एलजी, क्रोमटोन होज एप्लाइन्स, टिसिएल, गोदरेज होम एप्लाइन्स, ह्वाएरपोल एण्ड हाइसेन्स लगायतका बोर्डहरु हटाउन थालिएको हो ।
