चितवन, ३ जेठ
नेपाल र भारतका पोल्ट्रीसँग सम्बन्धित दुई संस्थाको आयोजनामा अन्तर्राष्ट्रिय पोल्ट्री प्रदर्शनी भरतपुरमा हुने भएको छ । नेपाल पोल्ट्री महासङ्घ र अल इण्डिया पोल्ट्री इक्युपमेन्ट म्यानुफ्याक्चर एशोसिएसनको आयोजनामा यही जेठ १८ देखि २० गतेसम्म प्रदर्शनी हुन लागेको हो ।
प्रदर्शनी भरतपुरस्थित प्रदर्शनी केन्द्रमा हुँदैछ । नेपाल पोल्ट्री महासङ्घका अध्यक्ष गुणचन्द्र विष्टले दुई सयभन्दा बढी स्टल रहने प्रदर्शनीमा १५ देशबाट प्रदर्शक सहभागी हुने जानकारी दिनुभयो ।
प्रदर्शनीमा पोल्ट्रीसँग सम्बन्धित सबै किसिमका उपकरण, प्रविधिलगायत सामग्री रहने छन् । व्यवसाय गरिरहेका र गर्न चाहनेहरूका लागि प्रदर्शनी निकै उपयोगी हुने उहाँले बताउनुभयो ।
प्रदर्शनीमा विदेशी प्रविधि र स्वदेशी प्रविधिका विषयमा विज्ञलाई बोलाएर पाठशाला सञ्चालन गरिने विष्टले जानकारी दिनुभयो । उहाँका अनुसार प्रदर्शनीमा आधुनिक प्रविधिका बारेमा छलफल गरिनेछ । कम लागतमा उत्पादन वढाउने विषयमा पाठशाला केन्द्रित रहने उहाँले बताउनुभयो ।
“कोभिडपछि नेपालको पोल्ट्री क्षेत्र धरासाही बन्दै गएको छ । अहिले समग्रमा उत्पादन आधा घटेको छ । धेरै व्यवसायी पलायन भएको अवस्था छ”, विष्टले भन्नुभयो, “पोल्ट्री क्षेत्रको वर्तमान समस्या र त्यसको समाधानका लागि पनि एक्सपो फलदायी हुनेमा विश्वस्त छौँ ।”
नेपालमा पहिलोपटक चितवनमा विसं २०५२ मा पोल्ट्री प्रदर्शनी गरिएको थियो । त्यसपछि यहाँ पोल्ट्री क्षेत्र विस्तार हुँदै क्रमशः फड्को मार्न सफल भएको विष्टले बताउनुभयो ।
नेपाल कुखुरा व्यवसायी मञ्चका अध्यक्ष रघुनाथ भट्टले अहिले समग्र अर्थतन्त्र कमजोर रहेको भन्दै पोल्ट्री क्षेत्र यसबाट प्रभावित बनेको बताउनुभयो । स्वदेश र विदेशका विज्ञहरु एक ठाउँमा उपस्थित भएर नयाँ प्रविधिका बारेमा ज्ञान आदानप्रदान गरिने भएकाले प्रदर्शनी प्रभावकारी हुने उहाँले बताउनुभयो ।
