चितवन, २ जेठ
भरतपुर महानगरपालिका वडा नं-२९, केराबारीनजिक ट्रकले मोटरसाइकललाई ठक्कर दिँदा बाबुछोरी घाइते भएका छन् । घाइते हुनेमा भरतपुर-१२ बस्ने ४९ वर्षीय रविकुमार पराजुली र १९ वर्षीया छोरी ऋतिका पराजुली रहेका छन् ।
नारायणगढ मुग्लिन सडकखण्डमा मुग्लिनदेखि नारायणगढतर्फ जाँदै गरेको ना ५ ख ९७५९ नम्बरको ट्रकले सोही दिशातर्फ जाँदै गरेको लु २७ प २०५१ नम्बरको मोटरसाइकललाई पछाडिबाट ठक्कर दिएको हो ।
रविकुमारको अवस्था गम्भीर रहेको र मोटरसाइकलपछाडि सवार छोरीको अवस्था मध्यम रहेको प्रहरीले जनाएको छ । घाइते दुबैजनाको पुरानो मेडिकल कलेजमा उपचार भइरहेको छ ।
प्रहरीले घटनास्थलबाट मोटरसाइकल, ट्रक तथा ट्रक चालक सप्तरीको सुनगाभा नगरपालिका वडा नं-२ बस्ने ३७ वर्षीय झकबहादुर भुजेललाई नियन्त्रणमा लिई आवश्यक कारबाही प्रक्रिया अगाडि बढाएको जनाएको छ ।
