चितवन, २९ पुष-
स्व पाचौं दीलिप राणा स्मृति अन्तराष्ट्रिय आमन्त्रण एट ए साइड भेटेरान फुटबल फागुन ७ देखि हुने भएको छ ।
चितवन भेटेरान फुटबल क्लबको आयोजनामा हुने प्रतियोगिता फागुन १२ गतेसम्म सञ्चालन हुनेछ । प्रतियोगिताको खेलहरु भरतपुर ७ स्थित कृष्णपुरको मैदानमा हुनेछ । प्रतियोगितामा नेपाल, भारत र बंगलादेशका गरी १६ टोलीको सहभागिता रहने आज (आइतबार) आयोजित पत्रकार सम्मेलनमार्फत जानकारी गराईएको छ ।
१६ टोली निश्चित भए पनि एक-दुई टोली थप हुन सक्ने कार्यक्रम संयोजक हरिप्रसाद भट्टले जानकारी दिनुभयो । प्रतियोगिताको विजेताले एक लाख ५० हजार रुपैयाँ प्राप्त गर्नेछ । उपविजेताले ७५ हजार रुपैयाँ प्राप्त गर्ने भट्टले बताउनुभयो ।
हरेक खेलको म्यान अफ दि म्याचले एक हजार, प्रतियोगिताभरको उत्कृष्ट खेलाडीले १० हजार प्राप्त गर्नेछ । यस्तै उत्कृष्ट गोलरक्षक, डिफेन्डर, मिडफिल्डर, सर्वाधिक गोलकर्ता र उत्कृष्ट प्रशिक्षकले जनही पाँच-पाँच हजार रुपैयाँ पाउनेछन् ।
प्रतियोगिताको तयारी सुरु भएको क्लबका अध्यक्ष रविन्द्र श्रेष्ठले जानकारी दिनुभयो । देश र विदेशबाट खेलाडीहरु आउने भएकोले यसले भरतपुर भ्रमण वर्षको प्रवर्द्धनका लागि पनि टेवा पुग्ने उहाँको भनाइ थियो । प्रतियोगिता सम्पन्न गर्न १३ लाख खर्च हुने अनुमान छ । क्लबले हरेक वर्ष स्व राणाको स्मृतिमा प्रतियोगिता आयोजना गर्दै आएको छ । स्व राणा पूर्व स्थानीय फुटबल खेलाडी हुन् ।
