माधव सापकोटा –
पौष ५, चितवन
संस्कृति मन्त्री सुदन किराँतीले हिजो एक कार्यक्रममा क्रिस्चियनको विरोध गर्ने संविधान विरोधी भएको र त्यस्ता देशद्रोहीलाई जेल कोच्नुपर्ने भनी दिएको अभिव्यक्तिको नेपाल सन्त समाजले कडा शब्दमा विरोध गर्दै निजलाई मन्त्री पदबाट बर्खास्त गर्न माग गरेको छ ।
सदियौँदेखि चलिआएको धार्मिक सहिष्णुता , सद्भावलाई दखल पुर्याउन जनचाहना विपरीत नेपालमा धर्मनिरपेक्षता लादिएको र बेलाबेलामा यहाँ मिलेर बसेका समुदायमा जाति , भाषा,धर्म र सम्प्रदायबिच भेदभाव र घृणा फैलाई आपसमा विभेद खडा गर्न धार्मिक आस्थामाथि प्रहार गर्ने काम हुन लागेको र नेपाललाई जातीय र धार्मिक द्वन्द्वमा फसाई आफ्नो साम्राज्य विस्तार गर्ने दुराशयका साथ विधर्मीहरू भ्रम छर्न व्यस्त रहेको जनाउँदै केही स्वार्थी व्यक्तिहरूले बेलाबेलामा धार्मिक तथा जातीय सद्भाव भड्काउने गैर जिम्मेवार अभिव्यक्ति दिने गरेको र त्यसैको निरन्तरता स्वरूप मन्त्री सुदन किराँतीको अभिव्यक्ति आएको र यस किसिमको अभिव्यक्ति सनातन धार्मिक आस्थामाथिको प्रहार र अक्षम्य अपराध हो भन्दै धर्मरक्षाका लागि सम्पूर्ण ॐकार परिवार एकजुट हुन र धर्मनिरपेक्ष व्यवस्थालाई समाप्त पारी धर्मानुप्राणित शासन व्यवस्थाको स्थापनाका लागि तयार रहन नेपाली जनसमुदायमा अपिल समेत गरेको छ।
यसैबिच मन्त्री किराँतीको अभिव्यक्तिको विरोधमा विश्व हिन्दु महासङ्घ चितवनले आज नारायणघाटको पुलचोकमा बेलुका ४:३० बजे विरोध प्रदर्शन गर्ने महासङ्घका चितवन अध्यक्ष प्रेम गैरेले जानकारी दिनुभएको छ।
