भरतपुर, असोज १९-
अनेरास्ववियु आदिकवि भानुभक्त माध्यमिक विद्यालय (+२) कमिटीले आज विद्यालय सहित चार कार्यालयमा ध्यानाकर्षण पत्र बुझाएको छ ।
नेकपा एमाले निकट विद्यार्थी संगठन अनेरास्ववियुले विद्यालयमा स्थायी विद्यालय व्यवस्थापन समिति नबनेकोले धेरै समस्या सृजना भएको र त्यसको समाधान गर्नुपर्ने लगायतका २० बुदा तयार गरि निमित्त प्रधानाध्यापक डम्बर बहादुर शाही, भरतपुर महानगरपालिका मेयर रेणु दाहालको सचिवालय, शैक्षिक महाशाखा भरतपुरका प्रमुख महेन्द्र पौडेल र वडा न। १ का वडा अध्यक्षको कार्यकक्षमा नै गएर ध्यानाकर्षण पत्र बुझाएको हो ।
कमिटी अध्यक्ष पदम कार्की (किसान) द्वारा हस्ताक्षरित ध्यानाकर्षण पत्रमा ूभरतपुर महानगरपालिका वडा नं। १ स्थित श्री आदिकवि भानुभक्त माध्यमिक विद्यालय चितवनको शैक्षिक इतिहासमा विरासत बोकेको विद्यालय हो । यस विद्यालयमा करिब २ बर्ष अघिदेखि चरम राजनैतिक खिचातानी, दाउपेच र स्वार्थका कारण २०७९ पौष २५ गतेदेखि स्थायी रूपमा विद्यालय व्यवस्थापन समिति गठन हुन नसक्नु गैरजिम्मेवारपन हो । विद्यालय व्यवस्थापन समिति गठनको लागि सार्थक पहल नगरि समिति गठन हुन नसकेको बहानामा शिक्षा ऐन, नियममा नभएको र सम्मानित सर्वोच्च अदालतले समेत अस्वीकार गरेको पक्षलाई स्थापित गरेर वडा अध्यक्ष नै अस्थायी विद्यालय व्यवस्थापन समितिको अध्यक्ष बनाउने कार्य मान्य छैन । स्थायी व्यवस्थापन समिति गठन गर्न नसक्नु विद्यालय प्रशासनको असक्षमता हो भने तमाम अभिभावक र विद्यार्थीमाथि गरिएको अन्याय हो । राजनीतिक स्वार्थ सिद्ध हुने गरि एकलौटी रूपमा अगाडि बढ्दा अहिलेको अवस्था सृजना भएको प्रष्ट छ । भन्ने उल्लेख छ ।
विद्यार्थीहरूलाई छात्रवृत्ति नदिएको, अभिभावक दिवस नमनाएको, वास्तविक अभिभावक बाट व्यवस्थापन समिति गठन गर्नुपर्ने, शिक्षकहरू नियमित विद्यालय नआउने गरेकोले पठनपाठनमा बाधा परेको, कम्प्युटर शुल्क उठाएर सिक्ने बाताबरण नभएको, पुस्तकालयमा प्रयाप्त पाठ्यपुस्तक नभएको, साइकल स्ट्यान्ड व्यवस्थित नभएको, विज्ञान संकाय बन्द गरेको, विद्यालय अनुदान उपयोग नगरि फ्रिज गरेको, शौचालय दुर्गन्धित रहेको लगायत २० बुदा ध्यानाकर्षण पत्रमा उल्लेख्य छ ।
विद्यार्थीमाथि भएका अन्याय, गैरजिम्मेवारीपन बाट श्रृजित समस्या समाधान गर्न अनुरोध गर्दै अनेरास्ववियुले तत्काल बिधार्थीको समस्या समाधान नभएमा, शान्तिपूर्ण आग्रहलाई बेवास्ता गरिएमा जस्तोसुकै प्रतिकार तथा सशक्त सङ्घर्षमा उत्रन बाध्य हुने र त्यसबाट श्रृजित परिस्थितिबारे सम्बन्धित निकायहरू नै जिम्मेवार हुने चेतावनी समेत दिएको छ ।
अनेरास्ववियु जिल्ला अध्यक्ष हरि आचार्य, सहसचिव प्रदिप पराजुली र विज्ञान अधिकारी सहित विद्यार्थीहरूको उपस्थितिमा उक्त कार्यालयहरूमा ध्यानाकर्षण पत्र बुझाईएको कमिटी उपाध्यक्ष मिलन गुरूङले जानकारी दिए । 
