श्रावण १०, २०८०
अस्ट्रेलियाको दक्षिण तटीय क्षेत्रमा ५१ वटा ह्वेल एकै पटक मृत अवस्थामा फेला परेका छन् । मंगलबार बिहानैदेखि ९० वटाको समूहमा अल्बनी सहर निजकैको ‘चेनिज बिच’मा ती ह्वेलहरू देखा परेका थिए ।
मंगलबार मध्याह्न ती ह्वेल समुद्री तटमा आइपुगेको अस्ट्रेलियन सञ्चारमाध्यमले उल्लेख गरेका छन् ।
पर्थका निकुञ्ज विभागका भेटनेरी चिकित्सकहरूले अहिले ती ह्वेल उद्धार गरिरहेका छन् । उद्धारमा समुद्री विज्ञ तथा स्यवंसेवकहरू पनि रातिदेखि नै खटिएका छन् ।
निकुञ्ज तथा वन्यजन्तु निकायले बुधबार बिहान ५१ वटा ह्वेल मृत अवस्था फेला पारिएको पुष्टी गरेको छ । ४६ वटा ह्वेल भने तटीय क्षेत्रमा तैरिएर बालुवामा पुगेका छन् । तीनलाई पुनः समुद्रमा पठाउनका लागि प्रयास भइरहेको छ ।
अस्ट्रेलियाको स्काई न्युजलाई बताउँदै मेरिन बायोलोजिस्ट भेनेसा पिरोटाले ती पाइलट ह्वेलहरू तटीय क्षेत्रमा कसरी आइपुगे भन्ने यकिन गर्न नसकिएको बताएकी छन् । ‘यी ह्वेलहरू कहाँबाट यो तटीय क्षेत्रमा आइपुगे भन्नेबारे हामी अनविज्ञ छौं । यसरी ह्वेलहरू तटीय क्षेत्रमा आइपुग्नु खोजको विषय हो, ‘ उनले भनेकी छन् । उनले यस्तो अवस्था अहिलेसम्म आफूले कहिल्यै नदेखेको बताइन् । पाइलट ह्वेललाई समूहमा बस्ने सामाजिक प्राणीको रुपमा लिने गरिन्छन् ।
यसअघि अस्ट्रेलियाको पश्चिमी समुद्र तटमा १५० भन्दा बढी ह्वेलहरूलाई फसेको अवस्थाबाट उद्धार गर्ने क्रममा केही ह्वेल मरेका थिए । त्यस्तै सन २००९ मा ८० भन्दा बढी ह्वेल र डल्फिन हेमेलिन खाडीको समुद्र तटमा मरेका थिए ।
पछिल्लो समय समुद्री तटमा ह्वेल लगायत जलप्राणीहरू ठूलो संख्यामा एकैपटक मृत भेटिँदा जलवायु परिवर्तनको असरबारे विज्ञ र अभियन्ताहरूले चिन्ता व्यक्त गर्दै आएका छन् ।
एजेन्सी
