काठमाण्डौं, २६ वैशाख ।
विराटनगरस्थित कोशी अस्पतालमा एक महिलाले शरीर जोडिएका दुई शिशु जन्माएकी छिन् । सप्तरीकी ३७ वर्षीया दुखनीदेवी चौधरीले छातीदेखि पेटसम्मको भाग जोडिएका दुई छोरी जन्माएकी हुन्।
यो दुर्लभ र अनौठो घटना भएको अस्पतालका चिकित्सकको भनाइ छ । चिकित्सकका अनुसार जोडिएका शिशुको कुल तौल ३ किलो ४०० ग्राम रहेको छ। शिशुका टाउको, मुख, आँखा, नाक, कान, हात र खुट्टालगायतका बाहिरी अंगहरू भने जोडिएका छैनन् ।
महिलाको परिवारका सदस्यहरु अहिलेसम्म सम्पर्कमा नआएको कोसी अस्पतालका निमित्त मेसु डा. रविनराज सिंहले बताउनुभयो।
मेसु सिंहका अनुसार महिलाले आफ्नो ठेगाना स्पष्ट भन्न सकेकी छैनन् । आफू लाहानमा पति भगत चौधरीसँग डेरा गरेर बस्ने गरेको ती महिलाले सुनाएकी छिन् । पति भगत मिठाइ बनाउने काम गर्ने पनि उनले भनेकी छिन् । आफू बिरामी परेपछि छिमेकी राधादेवी मण्डलले अस्पतालसम्म ल्याइदिएको र उनी फर्किएको महिलाले बताएकी छिन् ।
पति मोटरसाइकलमा अस्पताल आउँदै गर्दा दुर्घटनामा परेको र खुट्टा भाँच्चिएर राजविराज अस्पतालमा रहेको सुनेको महिलाले अस्तपालसमक्ष जानकारी दिएकी छिन् ।
परिवारका सदस्य र आफन्त अस्पतालको सम्पर्कमा आएका छैनन् । अरु सहयोग गर्ने खालका आफन्त नभएकोले अस्पतालमा कोही नआएको महिलाको भनाइ छ।यसअघि पनि दुई छोरी रहेको दुखनीदेवीले बताएकी छिन्। एउटीको बिहे भइसकेको छ भने एउटी १० वर्षकी छिन् ।
दुखनीदेवीलाई कोशी अस्तपालमा प्रसूति वार्डमा राखेर अस्पतालले नै रेखदेख गरिरहेको छ । अरु बिरामीका कुरुवाले पनि सहयोग गरिरहेका छन् ।
मेसु डा. सिंहका अनुसार बैशाख २१ गते सुत्केरी व्यथाले च्यापेको अवस्था उनी अस्पताल आएकी थिइन् । एक महिला पनि उनको साथमा थिइन् । अवस्था नाजुक भएकाले चिकित्सकको टोलीले तत्काल शल्यक्रिया गरी शरीर जोडिएका जुम्ल्याहा शिशु बाहिर निकालिएको थियो । शल्यक्रिया भएको ५ दिन भइसकेको छ ।
अस्पतालले आफ्नै खर्चबाट सुत्केरी र जुम्ल्याहा शिशुको हेरचाह, स्याहार एवं उपचार गरिरहेको छ । आफन्त सम्पर्कमा नआए समस्या हुने डा.सिंहले बताउनुभयो ।
