काठमाडौं माघ २५
प्रमुख प्रतिपक्ष दल नेपाली कांग्रेसका महामन्त्री गगनकुमार थापाले राष्ट्रिय स्वतन्त्र पार्टीलाई प्रश्न गर्न नपाइने हो भन्दै प्रश्न गरेका छन् ।
लोकतन्त्र संवाद केन्द्रले बुधबार काठमाडौंमा आयोजना गरेको कार्यक्रममा बोल्दै उनले नयाँ र वैकल्पिक शक्तिको रूपमा उदाएको दलले प्रश्नहरुको उत्तर दिनुपर्ने बताए ।
पहिलो पटक चुनाव लडेर जनताले अथाह साथ दिएको भन्दै उनले त्यो साथ र सहयोग ‘नो नट अगेन’ मुभमेन्टबाट आएको बताए । उनले पहिलो पटक नै किन सरकारमा गएको भन्दै प्रश्न गरे ।
“राष्ट्रिय स्वतन्त्र पार्टी अहिले आयो । कल्पना गरेभन्दा बढी मत जनताले दिनुभयो । यसको सन्देश मनन् गर्नुपर्छ सच्चिन दबाब दिएको छ । पार्टीको मत चाहिँ नो नट अगेन भनेर मत लिएको हो,” उनले भने, “सरकार चाहिँ किन गएको ? एकैपटक किन गएको ? सरकारमा गएर पुनः किन बाहिरिएको ? अनि किन समर्थन फिर्ता नलिएको ? सरकार छोड्दा समर्थन फिर्ता लिनुपरेन ? राष्ट्रिय स्वतन्त्र पार्टीलाई प्रश्न सोध्न नहुने हो ?”
प्रश्न अन्य दललाई जस्तै रास्वपालाई पनि आउने उनले जिकिर गरे । पार्टी अध्यक्ष रवि लामिछानेले केही दिन अघि गरेको पत्रकार सम्मेलन आफूले हेरेको भन्दै लोकतन्त्रमा प्रेस अभिन्न अंग भएकाले यसको स्वतन्त्रताको सम्मान गर्नुपर्ने बताए ।
