जनकपुरधाम, माघ ९-
जनकपुरधामका दुई युवकको अपरणपछि हत्या भएपछि जनकपुरमा आन्दोलन सुरू भएको छ ।
आन्दोलनकारीले रोहित र विष्णुलाई न्याय दे, प्रहरी प्रशासन मुर्दावाद, गृहमन्त्री राजीनामा देऊलगायतका नारा लगाएका छन् । धनुषाका एसपी विश्वराज खड्कालाई पनि कारबाही गर्नुपर्ने उनीहरूको माग छ ।
अपहरणकारीले हत्या गरेपछि धनुषा प्रहरीले आफ्नो कमजोरी ढाकछोप गर्न खोजेपछि पीडित परिवार र स्थानीय आन्दोलन थालेका हुन् । करिब सयौं संख्यामा रहेको उनीहरू जनकपुरको सडकमा बसेर प्रहरी प्रशासनविरुद्ध नाराबाजी गरिरहेका छन् ।
भारतको विहार राज्यमा पर्ने सितामढी जिल्लामा हत्या भएको अवस्थामा जनकपुरधाम ८ का २१ वर्षीय रोहित साह र वडा नम्वर १३ का २३ वर्षीय विष्णु साहको आइतबार बिहान शव फेला परेको थियो ।
फिरौती मागेलगत्तै प्रहरीलाई खबर गरेको र प्रहरीले उद्धारमा चासो नदेखाउँदा अपहरणकारीले दुईजननाको हत्या गरेको पीडित परिवारको आरोप छ ।
पुस २९ गते अपहरणकारीले उनीहरूको आवाज फोनमा सुनाउँदै परिवारसँग ५० लाख रूपैयँ फिरौती मागेका थिए ।
