चितवन, भदौ ३०-
नेपाल बाल संगठन (बालमन्दिर) चितवनले ५८ औँ राष्ट्रिय बालदिवसको अवसरमा सप्ताहव्यापी कार्यक्रम सम्पन्न गरेको छ ।
संगठनले भदौ २६ गतेदेखि नै सप्ताहव्यापी रुपमा बालबालिका केन्द्रित विषयमा अन्तरक्रिया तथा सहयोगको कार्यक्रम आयोजना गरेको हो ।
भदौ २६ गते रत्ननगर नगरपालिका स्तरीय राजनीतिक दल तथा सरोकारवालाहरुसँग राजनीति कार्यक्रमहरुमा बालबालिकाको प्रयोग विषयमा छलफल कार्यक्रम गरेको थियो ।
उक्त कार्यक्रममा रत्ननगर नगरपालिकाका प्रमुख सहित सो क्षेत्रमा क्रियाशिल राजनीतिक दल, शिक्षक तथा विभिन्न सरोकारवाला निकायका व्यक्तिहरुले दलहरुले बालबालिकालाई राजनीतिक कार्यक्रममा सहभागि नगराउने प्रतिवद्धता समेत जाहेर गरेका थिए ।
संगठनका सभापति रवि किरण पौडेलको अध्यक्षतामा भएको अन्तरक्रिया कार्यक्रमको संयोजन संगठनका सदस्य यशोदा अधिकारीले गरेकी थिइन् । संगठनका सचिव मुकुन्द शर्मा विडारीले बालबालिकाहरुलाई राजनीतिक दलले प्रयोग गर्दा उनीहरुको भविष्यमा असर गर्ने भएकोले संगठनले दलहरुलाई जिम्मेवार बनाउन कार्यक्रम गरिएको जानकारी दिए ।
त्यसैगरि संगठनले २८ गते मंगलबार देवघाट स्थित रामजानकी बालिका आश्रमका बालबालिकालाई बिहानको भोजन गराएको छ । संरक्षण गर्ने व्यक्तिको अभावमा रहेका ३६ जना आश्रित बालिकालाई संगठनले भोजन गराएको हो ।
उक्त कार्यक्रम संगठनका उपासभापति गुरुचन्द्र घिमिरेको अध्यक्षतामा सम्पन्न भएको थियो । भने, रामजानकी बालिका आश्रमकी सञ्चालक सावित्री टण्डनले बाल संगठनलाई धन्यवाद ज्ञापन गरेकी थिइन् ।
त्यसैगरी सोही दिन संगठनले बालमन्दिर परिसरमा रहेको अटिजम विशेष विद्यालयका बालबालिकालाई दिउँसोको खाजा खुवाएको थियो ।
संगठनका सभापति रवि किरण पौडेलले सरकारी स्तरमा सञ्चालित नेपाको एकमात्रै विद्यालय अटिजम विशेष विद्यालय रहेको भन्दै संगठनकै पहलमा सञ्चालित यस विद्यालयको लागि सहयोगको लागि अझ पहल गर्ने बताए ।
त्यसैगरि संगठनले चितवनको माडीमा रहेको मनमोहन बालग्रामम आश्रित ५१ जना बालबालिकालाई कपडा वितरण गरेको छ । उक्त आश्रममा सीमान्तकृत चेपाङ समूदायका बालबालिका धेरै छन् ।
आश्रममा आश्रित बालबालिकालाई नजिकिँदै गरेको चाडपर्वको लागि लक्षित गरेर कपडा वितरण गरिएको संगठनका सचिव मुकुन्द शर्मा बिडारीले बताए ।
कपडा वितरण कार्यक्रममा माडी वडा नम्बर ६ का वडाअध्यक्ष दीपेन्द्र पौडेल, संगठनका उपसभापति गुरुचन्द्र घिमिरे लगायत पदाधिकारी तथा सदस्यहरुको उपस्थिती रहेको थियो ।
नेपालमा भदौ २९ गते बाल संगठनको स्थापना दिवस तथा राष्ट्रिय बाल दिवस मनाउने गरिन्छ । यसपटक ‘बालमैत्री समाजको आधार : जिम्मेवार परिवार, उत्तरदायी सरकार’ भन्ने नाराका साथ ५८ औँ बाल दिवस मनाइएको छ ।
