चितवन, चैत्र २४-
देवचुली नगरपालिका–१५ स्थित प्रगतिनगर सालघारीको दुर्गा मन्दिरमा महिला तथा बालबालिकालाई लक्षित गरी निःशुल्क स्वास्थ्य तथा क्यान्सर सचेतना शिविरको आयोजना गरिएको छ ।
रोटरी क्लब अफ भरतपुर र चिल्ड्रेन क्यान्सर फाउन्डेसनको संयुक्त आयोजना तथा देवचुली नगरपालिका र वडा नम्बर १४ र १५ सँगको समन्वयमा शिविरको आयोजना गरिएको हो । स्थानीय आमा समूहहरूको पहलमा आयोजना गरिएको यस कार्यक्रमले ग्रामीण क्षेत्रमा स्वास्थ्य सेवाको पहुँच विस्तार गर्नुका साथै क्यान्सरजस्ता गम्भीर रोगहरूको प्रारम्भिक चरणमै पहिचान र रोकथाममा महत्वपूर्ण योगदान पु¥याएको आयोजकले बताएको छ ।
सो शिविरबाट करिब ३०० भन्दा बढी सेवाग्राही लाभान्वित भएको रोटरी क्लब अफ भरतपुरका अध्यक्ष डा कृष्णसागर शर्माले जानकारी दिनुभयो । यसअन्तर्गत १६० जनाको स्तन क्यान्सर परीक्षण गरिएकोमा ७ जनामा शंकास्पद समस्या देखिएकाले थप परीक्षणका लागि रिफर गरिएको छ । त्यस्तै, १०५ जनामा पाठेघरको मुखको क्यान्सर परीक्षण गरिएकोमा ४ जनामा पोजिटिभ र ५ जनामा अस्वस्थ सर्भिक्स देखिएको उहाँले बताउनुभयो । उनीहरुको थप उपचारका लागि रिफर गरिएको उहाँले बताउनुभयो । वडा नं. १४ र १५ का करिब ५० जना बालबालिका तथा वयस्कहरूले अन्य स्वास्थ्य परीक्षण तथा परामर्श सेवा प्रदान गरिएको थियो ।
पाठेघरको मुखको क्यान्सर, स्तन क्यान्सर तथा बाल क्यान्सरको जोखिम, रोकथाम र प्रारम्भिक पहिचानसम्बन्धी सचेतनामूलक कार्यक्रमको सहजिकरण डाक्टर शर्मा, डा प्रदीप न्यौपाने तथा सविता पन्थी लगायतको टोलीले आवश्यक उपचार सेवा प्रदान गरेको थियो । शिविरको प्राविधिक समन्वय आर एण्ड आर मल्टिस्पेशालिटी क्लिनिक र बी.पी. कोइराला मेमोरियल क्यान्सर अस्पतालले गरेका थिए । रोटरी क्लब अफ भरतपुरका अध्यक्ष डा. कृष्ण सागर शर्माको अध्यक्षतामा सम्पन्न कार्यक्रमको सहजीकरण रोटेरियन कृष्णराज गैरेले गर्नुभएको थियो।
वडा नं. १५ का अध्यक्ष सुरेश रानाभाट प्रमुख अतिथिका रहनुभएको कार्यक्रममा पास्ट प्रेसिडेन्ट तथा डिस्ट्रिक्ट ३२९२ का संयुक्त सचिव डा. रेबन्त कुमार भट्टराई, रोटरी क्लबका प्रेसिडेन्ट नोमिनी डा. बिनोद खण्ड तिमिल्सिनाले आफ्नो मनतव्य राख्नुभएको थियो ।
कार्यक्रमका वक्ताहरूले समाजमा विद्यमान स्वास्थ्य समस्याहरूको पहिचानमा यस्ता निःशुल्क शिविरहरूको महत्वपूर्ण भूमिका रहेको उल्लेख गर्दै आयोजक संस्थाहरूलाई धन्यवाद व्यक्त गरेका थिए। साथै आगामी दिनमा पनि यस्ता कार्यक्रमलाई निरन्तरता दिने प्रतिबद्धता व्यक्त गरिएको थियो ।
