– हिरालाल आचार्य ‘डायमण्ड’
चितवन, असार ९ –
मूल्यवृद्धिको विरोधमा अखिल नेपाल राष्ट्रिय स्वतन्त्र विद्यार्थी युनयिन (अनेरास्ववियु) वीरेन्द्र बहुमुखी क्याम्पस कमिटीले प्रदर्शन गरेको छ ।
आज विहीबार बिहान वीरेन्द्र क्याम्स चोकमा राजमार्ग अवरुद्ध गराउँदै नाराबाजी गर्दै विद्यार्थीहरुले प्रदर्शन गरेका हुन् ।
विद्यार्थीहरुले पेट्रोलियम पदार्थको मूल्य वृद्धि फिर्ता गर, देश बेच्न पाइँदैन–एसपीपी चाहिँदैन, सीसीटिभी फुटेज सार्वजनिक गर, दलाल अर्थमन्त्री राजीनामा दे, किसानहरुलाई मल बिउ तत्काल उपलब्ध गर, बलात्कारीलाई सजाय दे–नेहारीलाई न्याय दे लगायतका नारा लेखिएका प्लेकार्ड बोकेर प्रदर्शनमा उत्रिएका थिए ।
राजमार्गमा प्रदर्शनमा उत्रिएकाहरुलाई सवारी चालकहरुले पनि समर्थन गरेको देखिन्थ्यो । सडक अवरुद्ध भएर रोकिनुपर्दा पनि चालकहरुले विद्यार्थीको आन्दोलनलाई समर्थन गर्दै ‘होहो विरोध गर्नुपर्छ’ भन्दै सवारीबाट झरेका थिए ।
यसरी चक्काजाम नै गरेर गरिएको विरोधमा चालकहरुले नै समर्थन गरेको यो निकै नौलो विषय थियो । पेट्रोलियम पदार्थको मूल्यवृद्धिको मार सवारी सञ्चालकहरुलाई नै परेको हुँदा आन्दोलनमा उनीहरुको समर्थन देखिन्थ्यो ।
चालकामात्र होइनन् सुरक्षाकर्मीहरुले पनि विद्यार्थीले राजमार्ग अवरुद्ध गराएर गरेको उक्त प्रदर्शनमा कुनै हस्तक्षेप गरेनन् । यसरी मूल्यवृद्धि फिर्ता गराउन सबैको एउटै स्वर भएको सन्देश आजको प्रदर्शनले देखाएको थियो ।
प्रदर्शनपछि भएको कोण सभामा अनेरास्ववियुका जिल्ला नेता प्रकाश भट्टले संवोधन गरेका थिए । वीरेन्द्र बहुमुखी क्याम्पस कमिटी अध्यक्ष सुदिप पौडेलेको अध्यक्षतामा भएको कोणसभालाई सचिव सौगात बस्यालले सञ्चालन गरेका थिए ।
