काठमाडौँ, कात्तिक ५ –
गाजामा हमासको नियन्त्रणमा रहँदा नेपाली विद्यार्थी विपिन जोशीको गोली हानी हत्या गरिएको इजरायलले जानकारी दिएको छ ।
जोशीको पार्थिव शरीर इजरायल हुँदै नेपाललाई हस्तान्तरण गरेसँगै उनको परिवारले मंगलबार दाहसंस्कार गरिसकेको छ । सुदूरपश्चिमको कञ्चनपुरमा आयोजित दाहसंस्कार कार्यक्रममा सहभागी नेपालका लागि इजरायली राजदूत स्मूलिक एरी बासले जोशीको टाउकोमा गोली हानेर हमास समूहले हत्या गरेको बताएका हुन् ।
कञ्चनपुरमा बीबीसीसँग कुरा गर्दै राजदूत बासले फोरेन्सिक ल्याबको परीक्षणबाट जोशीको टाउकोमा गोली लागेको देखिएको बताए । जोशी जीवितै छन् भन्ने सबैलाई लागेको भए पनि हमासले नियन्त्रणमा रहेकै बेला उनको हत्या गरेको दाबी गर्दै राजदूत बासले विधिविज्ञान परीक्षणको प्रतिवेदनबाट पनि विपिनको टाउकोमा गोली प्रहार भएको पुष्टि भएको बताए ।
शोकमा रहेका परिवारलाई भेटेपछि राजदूत बासले विपिन जोशी साहस एवम् इजरायल-नेपाल सम्बन्धका प्रतीकका रूपमा रहने बताएका थिए ।
इजरायलले जोशीलाई युद्धको आक्रमणमा नभई बन्धक बनाएर गोली हानी हत्या गरिएको दाबी गरेको छ । इजरायलको यो दाबीबारे हमासले हालसम्म कुनै प्रतिक्रिया दिएको छैन ।
