चितवन, जेठ २५ –
सर्वाधिक डिजेल खरिद गर्ने ग्राहकलाई शुभ पेट्रोल्याण्ड प्रालि नारायणगढले सम्मान र उपहार प्रदान गरेको छ ।
‘ग्राहकका कारण हामी छौं, हाम्रो कारणले ग्रहाक हुने होइनन्’ भन्ने कुरालाई ध्यानमा राखेर दुई जना ग्राहकलाई ‘शुभ डिजेल स्टार’ को सम्मान प्रदान गरिएको पेट्रोल्याण्डका सञ्चालक सवल पियाले जानकारी दिए । चैत्र महिनामा सर्वाधिक डिजेल खरिद गर्ने एक जना बस चालक र अर्काे म्याजिक चालकलाई सम्मान गरिएको हो ।
‘शुभ डिजेल स्टार’ सम्मान हरेक महिना गर्ने गरी सुरु गरिएको बताउँदै सञ्चालक पियाले बैशाखमा सर्वाधिक डिजेल खरिद गर्नेलाई पनि छिट्टै सम्मान गरिने चितवन आजलाई बताए । बिल कलेक्शन लगायतका केही प्राविधिक ढिलाइका कारण चैत्रको सम्मान जेठमा गरिएको बताउँदै उनले अब समयमै हरेक महिना सम्मान गरिने बताए ।
पेट्रोल पम्पका सञ्चालक सबल पिया एक सामाजिक व्यक्ति समेत हुन् । उनी समाज सेवामा पनि अग्रसर छन् । पियाले पम्पको खर्चमा असाहय एवम् गरिब विद्यार्थीहरुलाई पढाउँदै आएका छन् । यस अघि पम्पले खर्च व्यहोरेर पढाएका दुई जना विद्यार्थीले एसईईमा उत्कृष्ट नतिजा हासिल गरिसकेको उनले बताए ।
यस कामलाई निरन्तरता दिँदै अहिले पनि थप तीन जना विद्यार्थीलाई पम्पको खर्चमा भरतपुरको नारायणी मावि र आदिकवि भानु माविमा पढाइरहेको उनले जानकारी दिए । थप एक जनालाई पढाउने तयारी गरिएको छ ।
पेट्रोल्याण्डले ग्राहकको गाडी निःशुल्क सफा गरिदिने गरेको छ । कपडाले गाडीको धुलो पुछेर सफा गरिदिने गरिन्छ । पेट्रोल हाल्न लाइनमा बसेका ग्राहकलाई सम्मानस्वरुप उनीहरुको गाडी सफा गरिदिने गरेको सञ्चालक पियाले बताए ।
कार, अटो, म्याजिक र माइक्रो साइजका जुनसुकै गाडीलाई पुछेर सफा गरिदिने गरिएको छ ।
शुभ पेट्रोल्याण्डले अटो चालकहरुलाई दशैंमा नयाँ लुगा वितरण गर्ने गरेको छ । यसैगरी माडीमा फुटबल क्लव रेड हिल युनाइटेडलाई पम्पले समयसमयमा सहयोग समेत गर्ने गरेको छ ।
जारी भरतपुर २४ गोल्डकपमा मेन अफ द म्याचको प्रायोजन पनि पेट्रोल पम्पले गरेको छ ।
पम्प सञ्चालनसँगै आफ्नो सामाजिक उत्तरदायित्व सम्झेर सबल पियाले गरेका सामाजिक कामको खुलेरै प्रसंशा हुने गरेको छ । व्यावसायिक सफलतासँगै समाजसेवामा पनि उत्कृष्ट योगदान दिने पेट्रोलपम्पका रुपमा परिचित छ, नारायणगढ लायन्स चोकमा रहेको शुभ पेट्रोल्याण्ड ।
