चितवन, कार्तिक ४ –
भरतपुर ४ रामघाट निवासी १८ वर्षीय युवा सुमंगल स्वामी (शिरिष बगाले) ले चितवनको लंकुमा रहेको लक्ष्मी बैकुण्ठनाथ मन्दिरदेखि भारतको बागेश्वरधामसम्म पैदल यात्रा गर्ने भएका छन् ।
कार्तिक ६ गतेबाट उनले पैदल यात्रा सुरु गर्न लागेका हुन् । पैदल यात्रा गर्नेबारे उनले आज पत्रकार सम्मेलनमार्फत जानकारी गराएका छन् ।
लक्ष्मी बैकुण्ठनाथ मन्दिर परिसरमा आयोजित पत्रकार सम्मेलनमा बोल्दै उनले लक्ष्मी बैकुण्ठनाथ मन्दिरदेखि पूर्वि नेपालको चतराधाम हुँदै भारतको बागेश्वर धामसम्म पैदल यात्रा गरिने बताए ।
विश्व सान्तीको कामना, हिन्दु राष्ट्रको पहिचान विश्वभरि फैलाउन र भरतपुरलाई विश्वसामु चिनाउनुपर्छ भन्ने उद्देश्यका साथ पैदल यात्रा गर्न लागिएको उनको भनाइ छ ।
बिहान ७ देखि १० बजेसम्म मन्दिरमा संकल्प गर्ने र १० बजेपछि यात्रा थाल्ने उनले जानकारी दिए । पैदल यात्राका क्रममा विभिन्न बाटोमा पर्ने विभिन्न स्थानहरुमा आफ्नो सनातन हिन्दु धर्मका बारेमा मानिसहरुलाई बताउँदै, हनुमान चालिसा गर्दै यात्रा गरिने उनले बताए । उनी भन्छन्, ‘कार्यक्रम गरिएका स्थानमा माहोल बनाएर केही न केही परिवर्तन गरेर हामी अगाडि बढ्छौं । बरु यात्रा गर्न वर्षाैं लागोस् । किनकी हामीले यही चिजका लागि जीवन अर्पेका हौं । त्यही भएर बरु वर्षाैं लागे पनि यसरी नै यात्रा गर्छौं ।’
उनले पूरा यात्रा गर्ने संकल्प आफूले मात्र लिए पनि विभिन्न दुरीसम्म अन्य साथीहरु ठाउँठाउँबाट जोडिँदै जाने बताए । विभिन्न जिल्लाका संबन्धित संघसंस्थाहरुले साथ दिने गरी यो यात्रा सुरु गरिएको उनको भनाइ छ । उनले यस यात्रामा आफ्नै जिल्लाको केही दुरिसम्म भए पनि जोडिन सबैलाई आह्वान गरेका छन् ।
