चितवन, १६ असोज
नेकपा माओवादीको भातृ संगठन अखिल नेपाल राष्ट्रिय विद्यार्थी संगठनको २३ औं राष्ट्रिय सम्मेलनमा चितवन विद्यार्थी नेता कृष्ण बहादुर सुनार केन्द्रीय सचिव पदमा उम्मेदवारी दिने तयारी गरेका छन् । भदौ १० गतेबाट सुरु भएको राष्ट्रिय सम्मेलनमा दलित तर्फको सचिव पदमा उम्मेदावरी दिने तयारी गरेको उनले बताए ।
“भ्रष्टाचारको अन्त्य र सुसासन सुनिस्चितताको लागि हाम्रो आन्दोलन, रोजगार, उत्पादन र समाजवादी विद्यार्थीको पक्षमा २३ औं राष्ट्रिय सम्मेलन” भन्ने नाराका साथ सुरु भएको राष्ट्रिय सम्मेलनमा सहमतिबाट नेतृत्व चयन गर्ने प्रयत्न भइरहेको छ । सहमति हुन नसके मतदानबाट नयाँ नेतृत्व निर्वाचित गर्ने तयारी रहेकोले सुनारले सचिव पदमा उम्मेदवारी दिने तयारी गरेका हुन् ।
चितवन को क्याम्पसमा लामो समय विद्यार्थीहरुको नेतृत्व गरेका सुनार विद्यार्थीबिच लोकप्रिय छन् । त्यसबाहेक विद्यार्थीहरुको पक्षमा भएका विभिन्न आन्दोलनमा प्रभावकारी र सफल नेतृत्व गर्दै आइरहेका सुनार अखिल क्रान्तिकारीको केन्द्रीय पदाधिकारीको भूमिकासहित थप सक्रिय हुने प्रयत्नमा छन् । उनले संगठनलाई कुनै पनि गुट तथा समूहको नभई विद्यार्थीको हक, हित र अधिकारका लागि संघर्ष गर्ने जुझारु र साझा संगठनको रुपमा अगाडि बढाउन आफ्नो भूमिका हुने बताएका छन् ।
राष्ट्रिय सम्मेलनबाट दुरदर्शी र सक्षम नेतृत्व निर्वाचित हुने विश्वास व्यक्त गरेका छन् । उनले विद्यार्थी संगठनमा उमेर हद लागू हुनुपर्ने, विद्यार्थी संगठनलाई देशको शैक्षिक समस्या पहिचान गरी समाधानका लागि प्रयत्न गर्न सक्षम बनाउन आफूले उम्मेदवारी दिन लागेको बताए ।
