– हिरालाल आचार्य ‘डायमण्ड’
चितवन, असोज ४ –
चितवनमै सिए पढाउन सुरु गरी सफल बनेको एम्स सिए र सिए पढाइको क्षेत्रमा नेपालको ब्राण्ड बनेको गुरुकुल सिएबीच सहकार्य भई चितवनमा ‘गुरुकुल सिए चितवन’ सञ्चालनमा आएको छ ।
त्यसको उद्घाटन देशका विभिन्न सिएहरु चितवन आएर गरेका छन् । चितवनलाई सिएको हब बनाउने उद्देश्यसहित गुरुकुल सिए चितवनको उद्घाटन गरिएको छ । सिए पढ्न काठमाडौं नै धाउनुपर्ने बाध्यतालाई मेट्दै आएको एम्स सिएले आफ्नो सेवालाई थप विस्तार गर्न गुरुकुल सिएसँग सहकार्य गरेको हो । भरतपुरको केन्द्रीय बस टर्मिनल (पारस बसपार्क) नजिकै मिलन चोकमा गुरुकुल सिए चितवन सञ्चालनमा ल्याइएको हो ।
उद्घाटन कार्यक्रममा बोल्दै गुरुकुल सिए चितवनका सञ्चालक सिए विशाल भट्टराईले एम्स सिएको सुरुवात गर्दाका संघर्षहरु सुनाए । उनले नै एम्स सिए नामक शैक्षिक संस्था खोलेर चितवनमा सन २०१९ सालबाट सिए पढाउन सुरु गरेका थिए ।
उनले भने,– ‘एम्स सिए सुरु गर्दा यस्तै सपना थियो, चितवनमा पनि पर्खाल लगाइएको घरभित्र सिए पढाइ होस्, तर त्यो बेला एउटा फ्ल्याटबाट सुरु गरेका थियौं ।’ अहिले एम्स सिएलाई परिस्कृति गर्दै उक्त सपना पूरा गर्न गुरुकुल सिएसँग सहकार्य गरेको बताए ।
चितवनलाई नै सिएको हब बनाउन एम्स सिएलाई केही परिवर्तन गर्न आवश्यक ठानेर गुरुकुल सिएसँग सहकार्य गर्न पुगेको उनको भनाइ छ । उनले भने, ‘एम्स सिए भनेर बोर्डमा नदेखिए पनि गुरुकुल सिए भनेर अगाडि बढ्दै गर्दा हामीले त्यो इतिहास जहाँबाट आएका थियौं । त्यो बिर्सेका छैनौं । हामीले जे नामबाट काम गरे पनि विद्यार्थीको भविष्य उज्जवल बनाउने तरिकाले अगाडि बढ्ने नै हो । त्यसका लागि कुन नामले अगाडि बढायो भन्दा पनि कसरी अगाडि बढाइयो भन्ने कुरा महत्वपूर्ण हुन्छ ।’
आफूले एम्स सिएमा पढ्दा विद्यार्थीहरुले सर काठमाडौंमा केही नयाँ पो छ कि भन्ने जिज्ञासा राखिरहने गरेको उनले स्मरण गरे । त्यसलाई बुझाउँदै आफूले चितवनमै विद्यार्थीलाई टिकाएर पढाउन सफल भएको सम्झिए । अब भने विद्यार्थीले काठमाडौंमा पाउने र चितवनमा पाउने कुरा एउटै रहेछ भनेर बुझ्दै गएको उनको भनाइ छ । आफ्नै घरकै खाना खाएर खुला वातावरणमा पढ्न पाउने भएपछि अब चितवनका विद्यार्थी झन् खुसी हुनेमा आफू विश्वस्त रहेको उनले बताए ।
यो यात्रामा विशाल भट्टराई अगाडि आइरहँदा विशाल भट्टराई अगाडि आउने नाम मात्र भएको बताउँदै उनले एम्स सिएलाई सफल बनाउन चितवनका सम्पूर्ण सिएहरुको साथ र सहयोग ठूलो रहेको स्मरण गरे । एम्स सिएबाट आफूले नेपालकै टप स्कोरका विद्यार्थीहरु उत्पादन गरेको सम्भँदै उनले अब गुरुकुल सिए चितवनबाट पनि त्यो इतिहास पक्कै लेख्ने अठोट गरेका छन् ।
कार्यक्रममा गुरुकुल सिएका फाउण्डर सिए मेघराज अर्यालले गुरुकुल सिएको इतिहासका बारेमा बताएका थिए । ९ वर्षअघि विभिन्न संस्थाहरुमा पढाउने विभिन्न विधाका शिक्षकहरु मिलेर गुरुहरुको शिक्षण संस्था भन्ने हिसाबले काठमाडौंको बागबजारमा गुरुकुल सिए खोलिएको बताए । त्यतिबेला ‘क्याप वान’ मा १६ जना विद्यार्थीबाट सुरु गरिएको बताउँदै उनले अहिले नेपालमा क्याप वान पढिरहेका जति विद्यार्थी छन् त्यसको ५० प्रतिशत गुरुकुलमा रहेको बताए ।
संस्थालाई विस्तार गर्दै लैजाने क्रममा बानेश्वर, बागबजारमै अर्काे शाखा खोलेर गुरुकुल सिए अगाडि बढिरहेको अवस्थामा अहिले चितवनमा एम्स सिएसँग सहकार्य गरी अर्काे शाखा गुरुकुल सिए चितवन खोलेको जानकारी गराए ।
फ्याकल्टी, स्रोतसाधन, तरिका उही हो भन्दै उनले काठमाडौंको गुरुकुल र चितवनको गुरुकुलमा हुने पढाइमा केही फरक नहुने जनाए । चितवनका विद्यार्थीलाई अब काठमाडौं धाइरहन नपर्ने उनको भनाइ छ ।
एशोसिएशन अफ चार्टर एकाउन्टेन्ट नेपालका बागमती प्रदेश प्रमुख सिए निशान पौडेलले चितवनमा सन २०१२ बाटै सिए पढाउन खोजेको भए पनि सफल गराउन नसकिएको स्मरण गर्दै सिए विशाल भट्टराईले त्यसलाई सफल पारिदिएको बताए ।
गुरुकुल सिएका फाउण्डर एवम् सिए मुकुल भट्टले प्रविधिसँग जोडेर सिए पढाउने गरिएको बताए । सिए पढ्न गुरुकुलमा कुनै पनि कुराको अभाव नरहेको बताउँदै उनले सिए पढ्नकै लागि भारत जानुपर्ने अवस्था अहिले नेपालमा नरहेको बताए । त्यसैगरी उनले अब चितवनबाट सिए पढ्नकै लागि काठमाडौं धाइरहन आवश्यक नरहेको उनले बताए ।
एशोसिएशन अफ चार्टर एकाउन्टेन्ट चितवनका सल्लाहकार सिए भिमान कार्कीले आफ्नो पालामा काठमाडौं र भारत पुगेर धेरै दुखः भोगि सिए पढ्नु परेको स्मरण गरे । उनले चितवनमा एम्सको पढाइलाई सफल बनाएको प्रति सिए विशाल भट्टराईको प्रसंशा गरे ।
एम्स सिएबाट अध्ययन गरी ‘क्याप टु’ मा नेपाल भर अहिलेसम्मकै सर्वाधिक नम्बर ल्याएर प्रथम हुन सफल विद्यार्थी सागर ज्ञवालीले सिए विशाल भट्टराईले एक्लै संघर्ष गरी पढाएर आफूलाई यो स्थानमा पुराएको भन्दै भट्टराईप्रति आभार प्रकट गरे ।
क्याप ३ मा अध्ययनरत विद्यार्थी सशांक कँडेलले सिए पढ्नेबेलामा आफ्नो मनमा खेलेका विचारहरु सुनाए । उनले सिए पढ्नु अगाडि यो त धेरै गाह्रो कुरा हो, पास हुन सकिन्न भन्ने हल्ला सुनिने गरेको बताए । उनले आफूमा लगनशिलता भए सिए पढ्न सकिने अनुभव सुनाउँदै दुविधामा नपर्न सिए पढ्न चाहनेहरुलाई आग्रह गरे ।
गुरुकुल सिए चितवनको उद्घाटनको अवसरमा आयोजित अन्तर कलेज हाजिरी जवाफ प्रतियोगिताका विजेतालई उद्घाटन समारोहमा पुरस्कार वितरण समेत गरिएको थियो ।
