चितवन, २८ भदौ
चितवनको सप्तगण्डकी बहुमुखी क्याम्पसमा दुई दिने वातावरणीय तथा सामाजिक सुरक्षा तालिम सम्पन्न भएको छ । जनसंख्या तथा वातावरण मन्त्रालय तथा यूएसएड अन्तर्गत संचालित यूएसएड जलजंगल कृयाकलापको आयोजनामा तालिम सम्पन्न भएको हो । तालिम भदौ २६/२७ गते संचालन गरिएको हो ।
पूर्वाधार विकास निर्माणका क्रममा वातावरणमा पर्ने नकारात्मक प्रभावलाई न्यूनिकरण गर्दै सकारात्मक प्रभावलाई प्रवर्द्धन गर्ने उपायलाई मुख्य उद्देश्य बनाई प्रशिक्षक प्रकाश आचार्यले सामाजिक सुरक्षा सम्बन्धि तालिम दिएका थिए भने धुर्व आचार्य र सुरज न्यौपानेले वातावरणीय सुरक्षाका विभिन्न पक्षहरूबारे प्रशिक्षण दिएका थिए ।
तालिममा समाजमा हुने घटनाहरुलाई कसरि न्यूनीकरण गर्न सकिन्छ, पूर्वाधार निर्माण गर्दा गर्दा अपनाउनु पर्ने सुरक्षा, समस्या र समाधानका विषयहरुमा विद्यार्थीहरुलाई जानकारी गराइएको थियो । निर्माणका क्रममा हुने नकारात्मक असरहरू जस्तै जल, तथा वायु प्रदूषण, माटो क्षय र जैविक विविधतामा पर्ने असरहरूबारे चर्चा गर्दै तिनलाई कसरी नियन्त्रण गर्न सकिन्छ भन्नेबारे व्यावहारिक सुझावहरू प्रशिक्षकले प्रस्तुत गरेका थिए ।
प्रशिक्षक धुर्व आचार्यले वातावरणी सुरक्षाको महत्व र सुरक्षण सम्बन्धी प्रष्ट पार्दै निर्माण कार्य र पूर्वाधार विकास निर्माण गर्दा वातावरणीय जोखिमहरुको पहिचान गर्नुपर्ने, त्यसको न्यूनिकरण कसरी गर्न सकिन्छ, त्यसका उपायहरु केके हुन सक्छन्, वातावरणीय सन्तुलनलाई कसरी समय सापेक्षिक बनाउन सकिन्छ र यसले दीर्घकालीन रुपमा कस्तो असर पार्छ यावत विषयमा प्रशिक्षण दिएका थिए ।
उक्त तालिममा Enviroment science, Sociology, Rural development, Social work बिषयमा अध्यनरत विद्यार्थीहरु, कर्मचारीलगायतको बाक्लो उपस्थिति रहेको थियो । तालिम क्याम्पसकै सभाहलमा संचालन गरिएको हो ।
उक्त कार्यक्रमलाई समापन गर्र्दै सत्तगण्डकी क्याम्पस प्रमुख खिमलाल दाहालले युएसए आइडीले यो कार्यक्रम राखेर सप्तगण्डकी क्याम्पसका विद्यार्थी, प्राध्यापक र कर्मचारीलाई समेत यो तालिमबाट समाजमा हुने वातावरणीय प्रभाव, सामाजिक सुरक्षा सम्बन्धी अपनाउनुपर्ने सावधानीको बारेमा प्रष्ट हुने मौका दिएको भन्दै आयोजकप्रति आभार प्रकट गरे । यस्ता खाले कार्यक्रम सप्तगण्डकी क्याम्पसको इतिहासमै यो पहिलो रहेको र यसले महत्वपूर्ण शिक्षा प्रदान गरेको महसुश हामी सबैले गरेको बताए ।
