चितवन,भदौ ८
तनहुँको ऐनापहरास्थित मस्र्याङ्दी नदीमा भएको बस दुर्घटनामा परेर मृत्यु भएकाहरुको शव भारत लगिएको छ । भरतपुर अस्पतालमा शव परीक्षण सकेपछि भारतीय वायु सेवाको जहाजबाट आज अपरान्ह भरतपुर बिमानस्थलबाट भारत लगिएको हो ।
मृतक २७ मध्ये २५ जनाको शव जहाजबाट लगिएको चितवनका प्रमुख जिल्ला अधिकारी इन्द्रदेब यादवले जानकारी दिए । उनका अनुसार बसका चालक र सहचालकको शव भने स्थलमार्गबाट भारतको गोरखपुरतर्फ लगिएको छ ।
मृतकको शव लिन भारतकी युवा तथा खेलकुद राज्यमन्त्री रक्षा निखिल खड्से पनि भरतपुर आएकी थिइन् । उनी पनि सोही जहाज चढेर भारत फर्किएकी छिन् ।
मृतक यात्रुका शव शुक्रबार राति नै तनहुँको आबुखैरहनीबाट भरतपुर ल्याइएको थियो । पोखराबाट काठमाडौं जाँदै गरेको भारतीय पर्यटक बोकेको यूपी ५३ एसटी ७६२३ नम्बरको बस शुक्रबार बिहान ११ः३० बजेको समयमा तनहुँको आबुखैरहनी नजिकै सडकबाट मस्र्याङ्दी नदीमा खस्दा पशुपतिनाथमा दर्शनका लागि हिडेका २७ पर्यटकको मृत्यु भएको हो ।
मृतकमध्ये १५ जना महिला, ११ जना पुरुष र एक जना चार बर्षकी बालिका रहेकी छन् । घाइते हुनेहरुमा ६ जना पुरुष र १० जना महिला रहेका छन् । घाइतेहरुको काठमाडौंमा उपचार भइरहेको छ । प्रहरीका अनुसार बसमा ४३ जना सवार थिए । मृतक र घाइते हुनेमा भारतको महाराष्ट्रको जलगाउँ जिल्लास्थित भुसावल गाउँका हुन् ।
