तनहुँ भदौ ५-
तनहुँको घाँसीकुवामा बुधबार बेलुकी भीषण पहिरो जाँदा पृथ्वी राजमार्ग पुर्ण रुपमा अवरुद्ध भएको छ। राजमार्ग अवरुद्ध हुँदा पोखरा भित्रिने र पोखराबाट बाहिरिएका सवारी तनहुँमा रोकिएका छन्।
तनहुँका प्रहरी प्रवक्ता डिएसपी दिपक कुमार रायका अनुसार ब्यास नगरपालिका–१२ घाँसीकुँवामा भीषण पहिरो झरेको छ। बेलुकी पाँचबजे खसेको पहिरोको कारण राजमार्ग पूर्णरुपमा अवरुद्ध भएको डिएसपी रायले बताए। उनका अनुसार राजमार्गको करिब एकसय मिटर माथिबाट खसेको पहिरोले सडक पुरिएको छ।
‘राजमार्ग एकतर्फी भएपनि खुलाउन सकिन्छ की प्रयासमा छौ। अहिले उपकरण परिचालन भईसकेको छ। तर, कति समयपछि राजमार्ग खुल्छ भन्ने यकिन छैन,’ उनले भने। उनका अनुसार राजमार्ग अवरुद्ध भएपछि पोखरा भित्रिने र पोखराबाट बाहिरिएका सवारीको तनहुँको दमौली क्षेत्रमा लाम लागिसकेको छ। पहिरोस्थल पोखराबाट करिब ५५ किलोमिटर पूर्व पर्छ, दमौलीबाट भने पाँचकिलोमिटर पूर्व पर्छ।
पहिरोले पुरिएको खण्ड बिस्तार भईरहेको पृथ्वी राजमार्गमा पर्छ। बिस्तारित पोखरा–मुग्लिन सडकको पूवि खण्डका इन्जिनियर विष्णु पाण्डेका अनुसार सडकको करिब १ सय ३० मिटर खण्ड पुरै पहिरोले पुरेको छ। पहिरोले बुल्दी खोलाको आधा भाग समेत माथिबाट खसेको पहिरोले पुरेको छ। आधा मात्र पुरिएकोले खोलाको वहाव भने रोकिएको छैन।
उनका अनुसार करिब एकसय मिटर माथिबाट पुरै डाँडो खसेको हो। यो ठाउँमा राजमार्ग बिस्तारको काम सकिएको थियो। राजमार्गको दुइलेन नै कालोपत्रे पनि भईसकेको थियो। इन्जिनियर पाण्डेका अनुसार माथिबाट खसेको पहिरो अझै पनि झरिरहेकोले तत्कालै खुलाउने अवस्था छैन।
