चितवन, ५ भदौ
सम्झना काफ्लेको मृत्युको विषयमा छानविन ९ सदस्यीय छानविन समिति गठन गरिएको छ । जिल्ला प्रशासन कार्यालय चितवनमा आज बसेको बैठकले भरतपुर अस्पतालका डाक्टर प्रकाश खतिवडाको संयोजकत्वमा ९ सदस्यीय छानविन समिति गठन गरेको हो ।
छानविन समितिले एकहप्ता भित्र सत्यतथ्य बुझि प्रमुख जिल्ला अधिकारीसमक्ष प्रतिवेदन पेश गर्ने निर्णय भएको छ । साथै घटनाको विषयमा थप छानविन गर्न गृह मन्त्रालय, स्वास्थ्य तथा जनसंख्या मन्त्रालय र नेपाल मेडिकल काउन्सीललाई अनुरोध गर्ने समेत निर्णय भएको छ ।
छानविन समितिबाट प्रतिवेदन प्राप्त भए पश्चात प्रतिवेदनमा उल्लेख भएवमोजिम कार्यवाही अगाडी बढाउने र मृतक काफ्लेको शव भरतपुर अस्पतालबाट बुझेर लैजाने सहमति भएको छ ।
डाक्टर खतिवडाको संयोजकत्वमा भएको छानविन समितिको सदस्यहरुमा बीपी कोइराला मेमोरियल क्यान्सर अस्पताल भरतपुरका ऐनेस्थेसिया डाक्टर प्रदिप थापा, प्रहरी निरिक्षक विवेक घिमिरे, अनुसन्धान अधिकृत अजय शर्मा, जिल्ला प्रशासन कार्यालय चितवनका प्रशाासकीय अधिकृत अन्तिम सिंजाली, पिडित पक्षका तर्फबाट अधिवक्ता रमेश काफ्ले र मन्दिरा काफ्ले सदस्य रहनुभएको छ ।
सोमबार पाठेघरको मासुको जाँचको लागि वायप्सी गर्नको लागि भरतपुर अस्पताल भर्ना भइ मंगलबार सामान्य शल्यक्रिया गर्ने भनिएपनि एनेस्थेसिया लगाएपछि नै मुटुको समस्या भएर काफ्लेको स्वास्थ्य गम्भीर भएको थियो । गम्भीर अवस्थामा भरतपुर अस्पतालकै आइसियूमा उपचार गरिएकी काफ्लेको राती निधन भएको चिकित्सकले घोषणा गरेका आफन्तले जनाएका छन् ।डाक्टरले एनेस्थेसिया लगाउने क्रममा गम्भीर अवस्था भइ मृत्यु हुने हजारौँमा एक जना हुने बताएका छन् ।
