काठमाडाैं, भदौ १
ताइपेई–माछा मार्ने चिनियाँ जहाज अज्ञात जहाजसँग ठोक्किएर ताइवान टापुको तटमा डुबेको छ । जहाज डुब्दा तीन जना बेपत्ता भएको ताइवानको तटरक्षकले शनिवार जनाएको छ ।
ताइवान र चीनलाई छुट्याउने साँघुरो जलमार्गमा बारम्बार हुने डुङ्गा दुर्घटनाले तनाव बढाएको छ ।
शनिवार बिहान चिनियाँ झण्डा भएको ‘मिन लङ यू ६०८७७’ जहाज किमेन टापुको तटबाट करिब ६.५ नटिकल माइल टाढा अज्ञात जहाजसँग ठोक्किएपछि डुबेको ताइवानको तटरक्षक प्रशासनले एक विज्ञप्तिमार्फत जनाएको छ ।
‘जहाजमा चालक दलका सातजना सदस्य थिए । चार जनालाई उद्धार गरिएको छ भने तीनजना बेपत्ता छन्,’ विज्ञप्तिमा भनिएको छ ।
यस क्षेत्रमा उद्धारका लागि पठाइएको डुङ्गाले बेपत्ता चालक दलका सदस्य फेला पार्न नसकेको बताएको छ।
ताइवानको तटरक्षक र यसका चिनियाँ समकक्षीहरूले तटमा खोजी र उद्धार गरिरहेको विज्ञप्तिमा भनिएको छ ।