बिहार, २८ साउन
भारतको बिहारस्थित जहानाबाद जिल्लाको सिद्धेश्वरनाथ मन्दिरमा आइतबार राति भागदौड हुँदा सातजनाको मृत्यु भएको छ । १० भन्दा धेरै मानिस घाइते छन् । घटना स्थानीय समयानुसार रातको १२ देखि १२ः३० का बीचमा भएको थियो ।
जहानाबादका एसडीओ विकास कुमारले भने, “यो एक दुःखद घटना हो । सबै व्यवस्था गरिएको थियो । हामी अवस्थाको जानकारी लिइरहेका छौँ । अहिलेसम्म सातजनाको मृत्यु पुष्टि भएको छ । घाइते १० जनाभन्दा बढी छन् ।”
जहानाबादका डीएम अलंकिता पाण्डेले समाचार एजेन्सी एएनआईलाई बताए, “हामी हरेक कुरामा नजर लगाइरहेका छौँ । अब स्थिति नियन्त्रणमा छ ।”
जहानाबादका एसएचओ दिवाकर कुमार विश्वकर्माले भने, “डीएम र एसपी घटनास्थलमा गएका छन् । उनीहरूले अवस्थाको जानकारी लिइरहेका छन् । कुल सातजनाको मृत्यु भएको छ ।”
उनका अनुसार, मृतक तथा घाइतेका परिवारलाई भेटेर थप जानकारी लिने कार्य भइरहेको छ । मृतकको पहिचानपश्चात् शव पोस्टमार्टमका निम्ति पठाइनेछ । स्थानीय अस्पतालमा घाइतेको उपचार जारी छ । बीबीसी हिन्दीबाट ।
