चितवन, १३ साउन
नारायणगढ–मुग्लिन सडकको केराबारीस्थित त्रिशूली नदीमा बेपत्ता बस र यात्रु खोज्न आएको भारतीय टोली स्वदेश फर्किएको छ ।
एक हप्ताको लागि भनि आएको भारतको नेसनल डिजास्टर रेस्पोन्स फोर्स (एनडिआरएफ)को टोलीलाई आज चितवनका प्रमुख जिल्ला अधिकारी इन्द्रदेव यादवले भारतीय टोलीलाई सिकाई समिक्षासँगै धन्यवाद दिएर बिदाई गरेका हुन् ।
गोताखोर, सोनार क्यामरा, चुम्बक लगायत अत्याधुनिक उपकरणसहित १२ सदस्यीय प्राविधिक टोली साउन ५ गते बेपत्ता बस र यात्रुको खोजि गर्न चितवन आइपुगेको थियो ।
उक्त भारतीय टोलीले नेपालको सशस्त्र प्रहरी, नेपाल प्रहरी र नेपाली सेनासँग मिलेर बेपत्ता बसको खोजी गरेको थियो । तर, आजसम्म सक्दो प्रयास गरेपनि उपलब्धी नभएको र एक हप्ताको समय पनि सकिएकाले टोली स्वदेश फर्किन लागेको हो।
बस तत्काल फेला पर्न सक्ने अवस्था नभएको र अब भेटिने शवहरुको पहिचान गर्न गाह्रो हुने प्रजिअ यादवले बताए । उनले भने, “भारतीय उद्धार टोली आज फर्किए, सशस्त्रसहित सेना र नेपाल प्रहरीको टोली भने निरन्तर त्रिशूलीमा खोजी कार्यमै छ ।”
सिमलतालदेखि ८० किलोमिटरको दूरी गोलाघाटसम्म निरन्तर गोताखोरको टोली खटिएपनि नियमित वर्षाका कारण त्रिशूलीमा पानीको बहाब बढ्दा खोजीकार्य प्रभावित हुँदै आएको छ ।
गत असार २८ गते नारायणगढ-मुग्लिन सडकको सिमलतालमा पहिरोमा परी दुई वटा बस त्रिशूली नदीमा खसेका थिए । नदीमा बस खस्ने क्रममा तीन यात्रुले पौडिएर ज्यान जोगाए भने कम्तिमा ६२ यात्रु नदीमा डुबे । त्यसयता दुवै बस भेटिएका छैनन् भने नारायणी नदीदेखि गण्डक व्यारेजम्म २४ जनाको शव भेटिएको छ । तीमध्ये १९ जनाको मात्रै शव सनाखत भएको छ ।
