चितवन, साउन ७ –
४६ औं पुष्पलाल स्मृति दिवसका सन्दर्भमा चितवनको माडीमा श्रद्धाञ्जली सभा सम्पन्न भएको छ । नेकपा एमाले माडी नगरपालिका वडा नम्बर ६ वडा कमिटीको आयोजनमा पुष्प मदन स्मृति वाटिकामा कार्यक्रम सम्पन्न भएको हो । वाटिकामा रहेको पुष्पलाल र मदन भण्डारीको शालिकमा माल्यार्पण गरेर श्रद्धाञ्जली सभा गरिएको हो ।
कार्यक्रममा एमाले केन्द्रीय सदस्य एवम् माडी नगर इन्चार्ज यम बहादुर परियार चितवनका कार्यवाहक अध्यक्ष श्याम कुमार विष्ट र जिल्ला कमिटी सदस्य श्रीप्रसाद दवाडीले पुष्पलालको योगदानका बारेमा चर्चा गरेका थिए ।
कार्यक्रममा एमाले नेताहरु शिवहरि सुवेदी, कमल रामदाम, पूर्णकला सुनार, तारा कुमारी काजी महत्तो, सिता तिमिल्सिना, विष्णुप्रसाद आचार्य, नारायण अधिकारी लगायतको उपस्थिति रहेको थियो ।
वडा कमिटी अध्यक्ष सूर्य भट्टराईको अध्यक्षतामा सम्पन्न कार्यक्रममा वडा इन्चार्ज पूर्णकला सुनारले स्वागत मन्तव्य राखेकी थिइन् भने सञ्चालन सञ्जय ढकालले गरेका थिए ।
नेपाल कम्युनिष्ट पार्टीका संस्थापक महासचिव पुष्पलाल श्रेष्ठको स्मृति दिवसमा नेपालका विभिन्न कम्युनिष्ट पार्टीहरुले विविध कार्यक्रम गरेर मनाउने गर्दछन् ।
श्रेष्ठको नेतृत्वमा २००६ बैशाख १० गते भारतको कलकत्ताको श्यामबजारस्थित एक बंगालीको घरबाट नेकपाको स्थापना भएको थियो ।
नेकपा स्थापना गर्दा संस्थापक सदस्यमा मोतीदेवी श्रेष्ठ, निरञ्जन गोविन्द वैद्य, नरबहादुर कर्माचार्य र नारायणविलास जोशी थिए । महासचिव पुष्पलाल आफै थिए ।
वि.सं. १९८१ असार १५ गते जन्मिएका पुष्पलालको २०३५ साउन ७ मा ५४ वर्षको उमेरमा निधन भएको थियो । उनको भारतको गोविन्द पल्लव अस्पतालमा उपचारका क्रममा निधन भएको थियो । उनको शवलाई तत्कालीन सरकारले नेपाल ल्याउन नदिएपछि उतै दाहसंस्कार गरिएको थियो ।
