चितवन, ६ साउन
सेन्ट्रल कलेज चितवन जिल्ला ए डिभिजन लिगका बाँकी खेलहरु आजदेखि हुने भएको छ । चितवन जिल्ला फुटबल संघले वर्षाका कारण असार २८ गतेदेखि स्थगित गरेको खेलहरु आजदेखि हुने भएको हो ।
अविरल वर्षाका कारण लिगका खेल सञ्चालित भरतपुर ७ कृष्णपुरको मैदान हिलाम्य भएकोले स्थगित भएको थियो । स्थगित खेलहरु आजबाट सुरु हुने संघका महासचिव रामहरि ढकालले जानकारी दिए ।
अबका खेलहरु भरतपुर १९ शारदानगरको मैदानमा खेलाईने गरी तयारी भएको ढकालले बताए । कृष्णपुरको विकल्पको रुपमा शारदानगरको मैदानमा खेलाउन लागिएको उनले जानकारी दिए । जसअन्तर्गत आज दुई खेल हुनेछ ।
पहिलो खेलमा हर्दी युवा समाज नारायणगढ फुटबल क्लब एनएफसी भिड्नेछन् । खेल दिउँसो २:३० बजे हुनेछ । यस्तै आजकै दोस्रो खेलमा दिउँसो ४:३० बजे एभरेष्ट क्लब चितवन र यात्रा ग्रुप भरतपुर भिड्नेछन् । चितवन जिल्ला फुटबल संघको आयोजनामा जारी प्रतियोगिताको मुख्य प्रायोजकमा सेन्ट्रल कलेज अफ भोकेसनल ट्रेनिङ प्रालि रहेको छ ।
